Me rastin e nisjes së vitit të ri akademik, kanë përcjell urimet edhe deputetët e qarkut Gjirokastër. Mirela Kumbaro, njëkohësisht edhe ministre e Kulturës, ‘rikthehet’ te Fakulteti i Gjuhëve të Huaja, si dhe kujton ish-profesorin e saj Vedat Kokona, për të cilin thotë se ai ka një kontribut të madh në formimin e saj si profesioniste e letrave.
Urimi i Kumbaros.
“Dy fjalë sot kur rihapen auditorët universitare ku kam kaluar jetën. Vit të mbarë e mendje të hapur për të gjithë studentët, por sidomos për Fakultetin tim të GJUHËVE TË HUAJA, ku tashmë ish-studentët e mi janë pedagogët e sotëm e ku pedagogët e mi kanë lënë modelin qe nuk zhbëhet! Prandaj sot kujtoj me respektin më të thellë Profesor Vedat Kokonën që u nda nga jeta fiks 20 vjet më parë, pa u larguar asnjë ditë nga tryeza ime e punës, nga kujtesa ime akademike dhe nga ushqimi letrar që më bëri profesioniste të Letrave. MERCI PROFESSEUR ”, shkruan Kumbaro në faqen e saj në Facebook.
Deputeti Flamur Golemi ishte i pranishëm në Universitetin e Gjirokastrës, ku krahas urimit për vitin e ri akademik, kërkon edhe një angazhim më të madh në favor të këtij universiteti.
Urimi i Golemit
“Nga dita e parë e deri në momentin e diplomimit është një rrugëtim i gjatë, por nëse punon çdo ditë me përkushtim dhe vendosmëri ia del mbanë. Ajo që në fillim mund të duket e pamundur, është plotësisht e arritshme nëse ju i jepni forca vetes. Shpreh urimet më të mira për studentët dhe pedagogët, në mënyrë të veçantë ata të Universitetit “Eqren Çabej”, me rastin e nisjes së vitit të ri akademik. Universiteti për Gjirokastrën është institucioni më i rëndësishëm, prandaj kjo na obligon të gjithëve me përgjegjësinë për të punuar në favor të tij. Suksese dhe vit të mbarë!”
Përmes Facebook ka përcjell urim edhe deputeti LSI-së, Vangjel Tavo.
“Të gjithë studentëve dhe pedagogëve i uroj një fillim sa më të suksesshëm të vitit të ri akademik!”, shkruan Tavo.
Urim për vitin e ri akademik ka bërë edhe kreu i PD Gjirokastër, Roland Bejko, ndonëse gjatë një komunikimi me mediat në universitet, ai i është referuar dy herë si ‘viti shkollor’.
‘Ne si opozitë do të paraqesim një paketë të plotë, e cila përfshin edhe Universitetin e Gjirokastrës, duke e gjallëruar këtë universitet jo vetëm përmes degëve të reja, por edhe duke rritur cilësinë”, tha Bejko.
