Po kthehet në një triller çështja e trupit të minoritarit grek, Konstandin Kacifas. Ekspertiza e Konstandin Kacifas në Bularat ishte kryefjala e një mbledhjeje urgjente të thirrur nga Prokuroria e Krimeve të Rënda në Tiranë.
Dy nga zyrtarët e mjekësisë ligjore u kërkuan në takimin me grupin e hetimit që po zbardh ngjarjen e Bularatit, të regjistruar për veprat e vrasjes për shkak të cilësive të veçanta të efektivëve të policisë dhe të nxitjes së urrejtjes mes kombeve.
Siç thotë një burim jozyrtar, Prokurorët e Krimeve të Rënda iu caktuan afat mjekëve ligjorë për të mbyllur sa më shpejt ekspertizën, në përfundim të të cilës akuza do të lëshojë edhe lejen e ceremonisë së varrimit, një procedurë kjo që parashikohet nga ligji për rastet kur ka pretendime të kundërta nga të afërmit e viktimës.
Por mediat greke thonë se autoritetet kanë thirrur babanë e viktimës, Janis Kacifas, duke i kërkuar që të nënshkruajë një dokument për të marrë trupin e djalit.
Newsbomb.gr shkruan se babait të viktimës i është kërkuar që të nënshkruajë një dokument ku thekson se nuk ka asnjë pretendim nga shteti shqiptar në shkëmbim të mrrjes së trupit për varrim.
Trupi i Kacifës u soll në Tiranë pas qëndrimit të prindërve të tij që hedhin dyshime për mënyrën si u qëllua nga policia.
Por pavarësisht kësaj prokuroria ka të administruar edhe raportin e shërbimit të forcave RENEA ku shpjegohen të gjitha fazat e këtij aksioni për kapjen e Kacifës, i cili u vra gjate shkëmbimit me armë zjarri.
Nga ana tjetër, ekspertizë pranë policisë shkencore po kryhet edhe për armën tip kallashnikov me dylbi të përdorur nga 35-vjeçari jo vetëm kur qëlloi ndaj RENEA-s dhe forcave “Shqiponja”, por edhe kur shtiu në ajër dhe ndaj dy automjeteve të Policisë Rrugore që ishin të parkuara në qendër të fshatit.
