Mijëra protestues mbushën mbrëmjen e së shtunës rrugët e Beogradit, në një manifestim kundër dhunës politike në Serbi. Protestuesit bënë thirrje kundër qeverisë dhe presidentit të vendit, ndërsa autoritetet nxorën në rrugë mjete të blinduara, e madje edhe tanke.
“Unë vendosa të dal në këtë protestë për të mbështetur popullin tonë dhe vendin tonë, sepse ne po shkojmë keq e më keq, kjo është e sigurtë”,- tha Perisa Andjeliç.
“Ne nuk jemi të kënaqur me lojërat e qeverisë sonë mbi Kosovën, lojërat me Bosnjen po ashtu. Njerëzit duhet ta dinë se çfarë ndodh”,- tha Dusan Miliçeviç. Protestuesit mbanin në duar pankarta kundër qeverisë, ndërsa motoja e marshimit ishte “Jo më këmisha të përgjakura”.
Protesta u mbajt pasi kryetari i Partisë së Majtë Serbe, Borko Stefanoviç u përgjak në një sulm në fund të nëntorit. Opozita u bëri thirrje qytetarëve për protestë, lidhur me mungesën e demokracisë në Serbi dhe shtypjen e zërave disidentë brenda dhe jashtë Parlamentit.
