Bordet e Administrimit në universitetet publike të vendit do të ndryshojnë me anëtarë të tjerë. Ky ishte vendimi i qeverisë pas protestës studentore. Rama njoftoi se një prej anëtarëve që i takon qeverisë në këto borde do ta përzgjedhin vetë studentët, prej kandidaturave që vetëofrohen. Në Universitetin ‘Eqrem Çabej’ në Gjirokastër u zhvillun zgjedhjet javën e shkuar, për të përzgjedhur nga studentët një prej kandidaturave të vëtëofrua për të qenë pjesë e bordit.
Tre ishin kandidaturat; Brunilda Lame, Dorina Mastora dhe Erjon Nebiaj. Pas votimit të studentëve dhe numërimit të votave, rezultati është ndarë në raporte të tilla me përqindje. 40% të votave i ka marrë kandidati Erjon Nebiaj, ndërsa dy kandidatet e tjera kanë marrë secila nga 30% të votave. Por pavarësisht këtij rezultati, vendimi final i takon ministres së Arsimit, Besa Shahini.
Ajo do të firmosë për njërin prej këtyre tre emrave, pavarësisht rezultatit të votimit nga studentët. Në fakt kjo procedurë duket të jetë absurde dhe nuk i jep asnjë vlerë votimit të studentëve. Pavarësisht se kë kandidat ata votojnë në shumicë, vendimi i takon Ministrisë së Arsimit. Më saktë vetë Ministrit, i cili zgjedh të konfirmojë si anëtar bordi atë që kanë votuar më shumë studentët ose edhe një prej dy kandidaturave të tjera në bazë të CV-së.
©argjiroja.net
