Një valë e re e emigrimit masiv nga Lindja në drejtim të Europës duket se ka nisur, menjëherë pas përhapjes në Turqi të lajmit se kufijtë drejt vendeve të BE-së janë të hapura dhe se mund të organizohen kalime në grup.
Aktualisht emigrantët ndodhen me shumicë në Greqi, ku sot janë shënuar problemet e para pas protestave të tyre me thirrjet “Duam Gjermaninë” dhe “Hapni kufijtë”.
Mediat greke raportojnë se mijëra refugjatë nga Lindja do të tentojnë të kalojnë në Eruopë nëpërmjet kufirit me Shqipërinë, ndaj autoritetet në pikat doganore janë alarmuar, pasi nuk kanë kapacitet për të pritur fluks të lartë refugjatësh.
Që prej 1 prillit në jug dhe juglindje të vendit janë konstatuar disa grupe emigrantësh, tashmë të ndaluar nga policia, por në Gjirokastër duket se drita e alarmit është bërë e kuqe.
Kreu i Policisë Kufitare në Gjirokastër, Idajet Hoxha ka konfirmuar për “Panorama” se pritet një fluks në rritje refugjatësh dhe sipas tij nëse do të mbërrinte vetëm 10% e sasisë së raportuar nga burime të pakonfirmuara, Shqipëria do të futej në emergjencë kombëtare. Hoxha ka theksuar se vendi ynë nuk ka kapacitetet e nevojshme pritëse për një fluks kaq të madh refugjatësh.
Karvani me mijëra njerëz që mendohet se do të nisen nga Turqia, do të kalojë në Greqi dhe Shqipëri. Një pjesë e këtyre njerëzve do të mbeten në këto vende, ndërsa të tjerë do të vijojnë udhëtimin drejt Perëndimit të Europës.
Pala greke ka marrë masa të rrepta, duke vendosur në kufi trupa ushtarake për të penguar futjen e karvanit në territorin e saj. Ndëkrohë, qendra e pritjes së klandestinëve në Babrru, e vemtja në Shqipëri tashmë i ka kaluar kapacitetet e veta akomoduese, duke mos pasur më mundësi strehimi të refugjatëve dhe klandestinëve, që hyjnë nga pikat tona kufitare.
