Sot është dita e fundit që kandidatët të regjistrohen në KQZ për zgjedhjet lokale. Deri më tani në Gjirokastër është zyrtarizuar kandidatura e Flamur Golemit nga PS dhe e Marenglen Kociut nga një parti që zor edhe t’i mbash mend emrin.
Nuk ka ende asnjë sinjal nga kryebashkiakja aktuale, Zamira Rami, për t’u futur në zgjedhje pavarësisht vendimit të opozitës për t’i bojkotuar. Kohë më parë gjatë një interviste për Argjirolajm.net ajo nuk e kishte fshehur ambicjen për një mandat të dytë në krye të Gjirokastrës. E pavarësisht vendimit të partisë së saj, Zamira Rami duhet të hyjë në zgjedhje për disa arsye.
Së pari për të përmbushur ambicjen personale për një mandat tjetër.
Së dyti për të provuar fluksin e saj të mbështetjes tek qytetarët. Në vitin 2015 mandati iu ‘dhurua’ nga PS-ja plus votat e LSI-së. Sot ajo duhet të testojë veten përballë qytetarëve.
Së treti, Zamira Rami duhet të kandidojë për të mbrotjur le të themi gjithë trashëgiminë e saj në këto 4 vite në krye të Bashkisë Gjirokastër dhe gjithashtu duhet të kandidojë për të mos ‘prerë në besë’ njerëzit që e kanë besuar dhe e kanë mbështetur.
Nga ana tjetër vazhdimisht ajo është shprehur se vinte si kandidaturë e shoqërisë civile, duke demonstruar në këtë mënyrë një lloj ‘alergjie’ nga të qenit partiake. Ky element e përligj akoma më shumë që ajo sot të shkojë të regjistrohet si kandidate e pavarur për Bashkinë Gjirokastër.
Zamira Rami duhet të veprojë njësoj si Leonidha Kristo i Bashkisë Finiq, i cili u regjistrua si i pavarur duke shpërfillur vendimin e gabuar të opozitës për të mos hyrë në zgjedhje.
©argjiroja.net
