Ish-deputeti i LSI-së në Gjirokastër, Vangjel Tavo e kuptoi se me reagimin që bëri për masakrën e Peshkëpisë, ia kishte futur kot. Për t’u shfajësuar apo le të themi për të ‘ruajtur fytyrën’, u detyrua të bënte një reagim të dytë ku tenton të sqarojë qëndrimin e tij. Por edhe me këtë reagim, Tavo le të kuptohet se masakra e Peshkëpisë nuk duhet hetuar. Sipas tij nuk duhet vënë drejtësi për vrasjen e Arsen Gjinit e Fatmir Shehut. Tavo është i mendimit se drejtësia duhej vënë më parë, tani nuk ka vlerë. Fakti se Fredi Beleri dhe ndonjë tjetër është nën hetim s’ka asnjë lidhje me minoritetin. Vangjel Tavo bën gabim që hetimin për Masakrën e Peshkëpisë e lidh me gjoja presion ndaj minoritetit. Mos e përzieni kot minoritetin me ata që vranë në emër të nacionalizmit të sëmurë grek. Minoriteti në Dropull s’ka lidhje me terroristët që bënë masakrën e Peshkëpisë dhe as me ekstremistin Kostandin Kacifas. Kaq!
Më poshtë reagimi i dytë i Tavos për këtë cështje.
Mbi çështjen e Masakrës së Peshkëpisë.
VAZHDIM:
Cilido që mendon se deklarata ime mbi këtë çështje anashkalon vendosjen e drejtësisë, kërkon vetëm të hedhë më shumë tymnajë dhe të shfrytëzojë e trazojë harmoninë etnike.
Bij nënash humbën jetën dhe fajtorët duhet të vihen përpara drejtësisë. Një drejtësi e vonuar dhe fatkeqësisht dhe tragjikisht e harruar. Pyetja ime është se përse tani? Përse pas 25 vitesh befas Prokuroria e risjell këtë çështje? Nëse do kishte të bënte me drejtësinë duhet të ishte kryer kohë më parë, por nëse ka të bëjë me devijacione të brendshme, nuk duhet të shfrytëzohet sot për qëllime politike. Autorët erdhën nga përtej kufirit. Përse 30-40 minoritarë brenda kufirit po merren në pyetje sot? Koha asnjëherë nuk është rastësore në politikë, ndaj edhe ky akrep i orës së kësaj çështje duket qartë se ka prapavijë politike.
Unë kam qenë dhe do jem gjithmonë pro jetës, pro drejtësisë, pro zbardhjes së çdo ngjarje në dëm të jetës njerëzore, por nuk do jem kurrë pro politizimit dhe shfrytëzimit për të krijuar diversione me jetën e atyre që u shuan dhe me kanosjen e harmonisë etnike e cila ka prevaluar prej shekujsh dhe është një vlerë e jashtëzakonshme e shoqërisë sonë. Zgjidhni krizën në Tiranë e mos fryni kriza artificiale mbi harmoninë dhe bashkëjetesën etnike.
