Gjatë vizitës në Nivicë ministri i Bujqësisë dhe Zhvillimit Rural, njëherazi edhe deputeti i qarkut Gjirokastër, Bledi Çuçi, vizitoi edhe baxho të zonës, të cilat grumbullojnë qumështin e blegtorëve për prodhimin e djathit dhe nënprodukteve të tij. Ai u ndal gjithashtu edhe në dy bujtina të zonës, të cilat mirëpresin turistë.
“Ky fshat dhe e gjithë zona përreth do të shndërrohet në një pol të rëndësishëm të turizmit malor në jug të vendit. Nuk është fare rastësi që sot në Nivicë takon edhe turistë, të cilët qëndrojnë aty për disa ditë për të shijuar natyrën dhe ushqimet tradicionale, mes të cilave spikat mishi dhe djathi me shije karakteristike”, është shprehur ministri Çuçi.
Një lajm i mirë për banorët e gjithë kësaj zone, tha ministri Çuçi, është miratimi i fondit për ndërtimin e lotit të dytë të rrugës që të çon drejt Nivicës. 8 milionë euro do të përdoren për segmentin Bënçë-Lekdush. Ky investim shkurton kohën për të shkuar në Nivicë dhe krijon një perspektivë të re për zhvillimin e kësaj zone.
