Sot në të gjithë vendin është heshtje zgjedhore. Nesër shqiptarët do t’i drejtohen kutive të votimit për të zgjedhur kryebashkiakët e rinj. Në Gjirokastër kandidati i vetëm në garë është Flamur Golemi nga Partia Socialiste. Teksa kthen kokën pas në këto 30 ditë për të analizuar apo kuptuar më mirë këtë fushatë atipike me një kandidat të vetëm, ajo që bie në sy ndër të tjera është edhe heshtja e Zamira Ramit.
Kryebashkiakja aktuale ka qenë në një ‘heshtje zgjedhore’ gjatë gjithë fushatës. Përjashto dy shkresa të firmosura prej saj për lirimin e ambienteve të KZAZ-së tek pallati i sportit, Zamira Rami s’ka dhënë fare asnjë deklaratë, asnjë qëndrim për 30 qershorin. Ajo nuk ka folur as kur Edi Rama, Bledi Çuçi, Mirela Kumbaro dhe Flamur Golemi janë shprehur herë pas here gjatë fushatës, se me të në krye të Bashkisë, Gjirokastra humbi shumë kohë dhe se Zamira Rami nuk e justifikoi besimin që iu dha katër vite më parë.
Ndonëse është atakuar për punën e saj, ajo s’ka bërë qoftë edhe dy radhë në Facebook për të mbrojtur mandatin që mori, punën dhe njerëzit e saj me të cilët drejtoi Gjirokastrën për katër vite. Heshtja është flori thotë një shprehje. Mbase prej kësaj është nisur edhe Zamira Rami. Ajo ka kuptuar më herët se të tjerët, që 30 qershori është i pakthyeshëm dhe se socialistët do ta merrnin me patjetër drejtimin e Gjirokastrës. Prandaj nuk i ka interesuar konflikti dhe përballja.
Në ndryshim, fjala vjen nga Voltana Ademi në Shkodër apo kryebashkiakë të tjerë të opozitës, Zamira Rami ka qenë totalisht pasive në ‘betejën’ opozitare. Edhe shkresat për të nxjerrë jashtë pallatit të sportit KZAZ-në, duket se i firmosi si e detyruar prej porosive politike që i vinin nga Tirana. Ajo e ka ditur shumë mirë që policia bashkiake, përfshi edhe komandantin e saj, nuk do të guxonte të zbatonte urdhërin për të ndërhyrë me forcë në pallatin e sportit.
Zamira Rami nuk shkoi as vetë tek KZAZ-ja. Refuzoi ashtu siç ka refuzuar vazhdimisht edhe shumë protesta dhe shfaqjen përkrah Dasho Alikos e Tritan Shehut. Për sy e faqe ka dërguar herë Krenarin, herë Aurelin apo ndonjë tjetër.
Heshtja e Zamira Ramit nuk lidhet vetëm me planin e saj për të mos krijuar konflikte dhe për të lenë një derë hapur te PS-ja, aq më tepër tani kur opozita ka marrë rrokullimën. Por ajo ka edhe një dimension tjetër. Dëshmon se Zamira Rami nuk del vetë në krye të ‘betejës’, por kërkon t’i nxjerrë nga prushi gështenjat e pjekura me duart e të tjerëve.
Së paku për dy vite ka qenë njeriu më i pushtetshëm i opozitës në Gjirokastër. Në kulmin e aksionit opozitar muajt e fundit, Zamira Rami është fshehur. Ne s’kemi asnjë qëndrim të saj të shprehur publikisht, sidomos për akuzat që i janë bërë gjatë fushatës. Nuk jemi duke thënë se ajo duhet të bllokonte rrugët. Këtë pjesën e ‘kamikazllëkut’ e bën shumë mirë PD-ja me Tritan Shehun në krye. Ama do duhej që ajo të kishte qëndrimin e saj publik për gjithçka ka ndodhur këto muaj dhe në mënyrë të veçantë gjatë fushatës.
©argjiroja.net
