Ish-deputeti i LSI-së, Vangjel Tavo, është parë në Dropull pasditen e sotme. Burime të argjiroja.net thonë se Tavo ka patur një takim me vëzhgues të huaj në një prej lokaleve të fshatit Goranxi. Mësohet se atyre u ka thënë që ka informacione se kutitë e votimit janë të hapura paraprakisht, në mënyrë që të rritet pjesëmarrja e votuesve në mënyrë fiktive. Tavo pretendon që në Dropull nuk do të votojnë as 20% e votuesve.
Nuk dihet se mbi ç’baza i bën Tavo këto llogari, sidoqoftë nuk është sekret që ai tashmë ndodhet në një pozitë shumë të vështirë sepse pasi hoqi dorë nga mandati i deputetit duke i besuar verbërisht Bashës dhe Monikës, shikon se si do të humbasë edhe Bashkinë Dropull, ‘kështjellën’ e tij të fundit.
Ndaj Tavo do të bëjë të gjitha përpjekjet, përfshi edhe diversionin tek ndërkombëtarët, në mënyrë që procesi të delegjitimohet. Pas takimit me vëzhguesit e huaj, Tavo është parë në një prej lokaleve të fshatit Grapsh, aty ku është vendosur edhe KZAZ-ja e Dropullit. Ndërkohë Ahile Deçka, kryebashkiaku aktual, ndodhej në fshatin Vrisera, ku refuzonte të jepte çelësat për qendrat e votimit. Pas disa minutash debatesh, në fund Deçka u bind për të mos u bërë pengesë e procesit zgjedhor. Në Dropull PS kandidon Dhimitraq Tolin.
Materialet zgjedhore kanë mbërritur në KZAZ. Nuk dihet se si do të shkojë nesër procesi, por pas ultimatumit amerikan ndaj opozitës, gjasat janë që të mos ketë incidente. PD-LSI tashmë e fokusojnë strategjinë e tyre në një drejtim tjetër. Të bëjnë çmos që të dalin sa më pak njerëz nga shtëpia për të votuar. Nëse pjesëmarrja është e ulët në rang kombëtar, opozita do të thotë se populli refuzoi Edi Ramën dhe ne kemi të drejtë në kërkesat tona. Megjithatë të shohim çdo të ndodhë pas 1 korrikut.
©argjiroja.net
