Dy inspektorë të Tatimeve në Gjirokastër janë pezulluar nga puna pasi kërkuan ryshfet. Lajmin e bën me dije ministrja e Financave, Anila Denaj gjatë një komunikimi me mediat nga Gjiri i Lalzit, ku ajo kishte dalë në terren për të parë aksionin antiinformalitet. Argjirolajm.net u interesua për të mësuar më shumë rreth këtij rasti. Burimet thonë se dy inspektorët e Hetimit Tatimor të Drejtorisë së Rajonit Jugor, kishin shkuar në një hotel në zonën muzeale të Gjirokastrës.
Duke shfrytëzuar funksionin publik, ata kërkuan para tek menaxheri. Rasti u denoncua më pas nga pronari i hotelit. Aktualisht inspektorët janë të pezulluar nga puna, ndërsa ka nisur verifikimi i denoncimit ndaj tyre për të mësuar realisht se deri ku shkon përgjegjësia.
Argjirolajm.net inkurajon çdo biznes që ndihet nën presion nga inspektorët e Tatimeve apo agjenci të tjera shtetërore, të mos heshtin, por të denoncojnë rastet kur abuzohet me funksionin publik. Lufta kundër korrupsionit është një angazhim i përbashkët. Ne si media në çdo rast do të bëjmë publike denoncime të tilla ndaj zyrtarëve që shfrytëzojnë postin për të kërkuar ryshfet.
©argjiroja.net
