Mbledhja e parë për konstituimin e Këshillit Bashkiak Gjirokastër ishte e shkurtër dhe e qetë. Nuk pati votime të fshehta duke qenë se në propozimet për kryetarin e Këshillit, nënkryetarët apo anëtarët që do të përfaqësojnë bashkinë në Këshillin e Qarkut, këshilltarët ranë dakord për votim të hapur. Pas rreth 60 minutash Flamur Golemi u nis për në zyrën e lënë bosh nga ish-kryetarja, Zamira Rami.
I shoqëruar nga deputetët Çuçi, Kumbaro e Malo, si dhe prefekti Astrit Aliaj e zv.ministrja Rovena Voda, kryetari i sapo betuar hyri në zyrën e të parit të qytetit. Nën vëzhgimin e kamerave të sigurisë, që ish-kryetarja i kishte instaluar së fundi në ambientet e bashkisë dhe që ndoshta sot ka parë gjithçka nga aparati i saj celular, Golemi u prit në paradhomë nga shefja e kabinetit të Zamira Ramit.
Freskida Çako, ish-kandidate për deputete e LSI-së, shtrëngoi duart me Golemin dhe e futi brenda në zyrë. Bashkë me të ishte edhe Vangjel Muço, nënkryetari i Bashkisë me të cilin Flamur Bime bënte dikur gjithë punët publike në Gjirokastër dhe më pas Zamira Rami e mbajti po aty si njohës të mirë të qytetit dhe infrastrukturës së tij.
Çako e Muço, si dhe shefi i Policisë Bashkiake, ishin dy njerëzit e administratës së Zamira Ramit që pritën Flamur Golemin. Më pas në zyrë bujtën të gjithë; nga mbështetësit deri tek servilët, nga militantët e deri tek qytetarët e zakonshëm. Të gjithë donin së paku një shtrëngim duarsh dhe një foto me kryebashkiakun e ri. Tre elementë bënë përshtypje në zyrën që Rami i kishte lënë Golemit.
Së pari, aty mungonte fotografia zyrtare e Ismail Qemalit, detyrim ligjor e protokollar për çdo zyrë të shtetit. Madje siç u mësua aty, nuk ka patur në zyrë as më parë foto të Ismail Qemalit. E habitshme! Ndoshta ish-kryebashkiakja mbante portretin e Ilir Metës të cilin e ka larguar prej aty bashkë me sendet e tjera personale të saj.
Së dyti, në tavolinën e punës nuk kishte asnjë dosje dhe as një kompjuter. Përbri sallonit qëndronte një televizor i vjetër si për të të kujtuar kohën kur në atë zyrë ishte Flamur Bime. Kishte një kontrast shumë të madh mes ‘moshës’ së televizorit, epokës ‘hight tech’ në të cilën jetojmë dhe orendive të tjera të zyrës. Televizori ishte ndoshta objekti më i vjetër në zyrë. Mbase ruhej me fanatizëm nga ish-kryetarja si relike e fillim viteve ’90 kur shqiptarët nisën të blenin masivisht televizorë me ngjyra.
Së treti, në zyrë nuk kishte një flamur kombëtar të madh në sfondin pas tryezës së punës së kryetarit. U soll më vonë për efekt fotosh e kamerash nga një sallë tjetër. Çuditërisht njerëzit e stafit politik të kabinetit nuk ishin larguar bashkë me ish-kryetaren siç ndodh në raste të tilla kur ka rotacion. Figuronin në punë sipas shefes së Burimeve Njerëzore edhe pse nuk ishin aty për momentin. Ndoshta kishin marrë lejen e zakonshme…
Pamja nga zyra e kryebashkiakut të Gjirokastrës ishte interesante. Ndodh shpesh që zyrtarët e rinj kur futen në zyra kanë maninë të ndryshojnë arredimin apo edhe pozicionimin. S’e dimë çfarë do të bëjë Flamur Golemi në këtë rast, por fundja kjo është gjëja më pa rëndësi për ne. Mbi të gjitha ai duhet gjykuar nga performanca e tij. Sot e tutje është në provë dhe përballë gjykimit qytetar për mënyrën se si do ta qeverisë Gjirokastrën. Të shohim!
©argjiroja.net
