Policia e Sarandës ka vënë në pranga një person i dyshuar si piroman, që digjte makinat në qytet. Ylli Kola, 25 vjeç, banues në Tepelenë, dyshohet se i vuri zjarrin makinës së biznesmenit, Qirjako Gjini, tip ‘Range Rover’, dy ditë më parë. Kola rezulton me precedentë të mëparshëm penal, ndërsa paraprakisht dyshohet se ai ishte paguar për djegien me benzinë të automjetit të biznesmenit.
Njoftimi i policisë:
Policia zbardh ngjarjen e djegies së automjetit dy ditë më parë. Arrestohet nga policia autori i dyshuar.
Specialistët e Krimeve pranë Komisariatit të Policisë Sarandë, pas hetimeve të kryera në lidhje me djegien e automjetit Range Rover në lagjen nr.4, më datë 02.08.2019, kanë bërë të mundur identifikimin dhe kapjen e autorit të dyshuar, shtetasin Y. K., 25 vjeç, banues në fshatin Toç, Tepelenë.
25 vjeçari nga Tepelena dyshohet se për motive të dobëta, i ka vënë zjarrin me lëndë djegëse automjetit në pronësi të shtetasit Q.Gj. Materialet iu referuan Prokurorisë në ngarkim të tij për veprën penale “Shkatërrimi i pronës me zjarr”.
