Pas marrjes së detyrës, kryebashkiaku i Gjirokastrës Flamur Golemi ka nisur të bëjë ndryshimet e para në radhët e drejtuesve të agjencive apo drejtorive të bashkisë. Sot është prezantuar drejtori i ri Shërbimve Publike. Ai është Ylli Muho, ish-nënkryetari i Bashkisë Gjirokastër për rreth 1 vit e gjysmë në kohën kur drejtonte Zamira Rami.
Muho është prezantuar sot nga Golemi me punonjësit e ndërmarrjes dhe i është kërkuar një angazhim më i madh për menaxhimin e mbetjeve urbane, pastrimin dhe gjelbërimin e qytetit. Muho zëvendëson në këtë detyrë Et’hem Seferin. Në shkurt 2017, Zamira Rami e shkarkoi Ylli Muhon nga posti i nënkryetarit të bashkisë. Asokohe Muho lëshoi akuza të rënda ndaj kryebashkiakes.
“Arroganca boshe e saj në marrëdhënie e raport me punonjësit e institucionet dhe së dyti, padituaria ekstreme që ka dëmtuar rëndë punën dhe besimin e qytetarëve. Në këto dy vese të shëmtuara kryetarja e Bashkisë Gjirokastër. zj. Z.Rami ka thyer rëndë marrëdhënien institucionale, politike, njerëzore si dhe ka dëmtuar besimin e qytetarëve”, shprehej Muho.
Më tej ai i kërkonte ndjesë socialistëve dhe qytetarëve të Gjirokastrës që kishte mbledhur vota për të bërë Zamira Ramin kryetare bashkie. Muaj më vonë Ylli Muho u emërua drejtor i Bordit të Kullimit.
©argjiroja.net
