Një aksident ka ndodhur mesditën e sotme në autostradën Gjirokastër-Kakavijë. Sipas policisë i plagosur ka mbetur shtetasi Flamur Pashaj, 62 vjec, banues në Fier. Ai është goditur nga një automjet pranë fshatit Grapsh teksa po kalonte nga njëra anë e rrugës tek tjetra. Makina e cila e goditi e drejtohej nga 20 vjecari me inicialet E.H, banues po në Fier.
Argjirolajm.net zbulon të tjera detaje nga ngjarja, të cilat policia e Gjirokastrës nuk i sqaron në njoftimin paraprak. Flamur Pashaj punonte si shofer që transportonte mallra të ndryshme nga Greqia. Ai ka ndaluar me makinë pranë fshatit Grapsh, për t’u hedhur nga ana tjetër e rrugës ku po e priste një makinë policie. Ndoshta ishte patrulla e policisë rrugore.
Eshtë ende e paqartë nëse 62-vjecari kishte ndonjë porosi për të lënë të policët apo ata e ndaluan rutinë sic bëjnë me automjete të tjera. Në momentin që do të kalonte rrugën, Flamur Pashaj është goditur nga makina që po vinte me shpejtësi dhe drejtohej nga 20-vjecari.
Përplasja ka qenë e fortë duke i shkaktuar atij plagë të rëndë. Oficerët e policisë e kanë parë të gjithë skenën. Madje, shton burimi, janë ata që e transportuan për në spitalin e Gjirokastrës 62-vjecarin. Më pas i plagosuri i dërgua drejt Tiranës me helikopter për shkak të gjendjes së rëndë shëndetësore. Në komisariatin e Gjirokastrës u shoqërua shkaktari i aksidentit. Më poshtë njoftimi paraprak i policisë për ngjarjen.
Njoftimi
Në aksin nacional Gjirokastër – Kakavije, në afërsi të fshatit Grapsh, automjeti tip “Benz”, me drejtues shtetasin E.H, 20 vjeç, banues në Fier, ka goditur shtetasin Flamur Pashaj, 62 vjeç, banues në Fier, i cili është transportuar në Spitalin Rajonal Gjirokastër.
Shtetasi E.H. është shoqëruar në ambjentet e Komisatiatit të Policisë Gjirokastër. Në vendngjarje ka shkuar grupi hetimor dhe po punon për zbardhjen e plotë të ngjarjes.
