Kryetari i ri i bashkisë së Gjirokastrës Flamur Golemi ka lëshuar akuza të forta në drejtim të ish-kryetares Zamira Rami, e zgjedhur nga radhët e LSI-së dhe që drejtoi institucionin për 4 vite.
Në mbledhjen e Këshillit Bashkiak që u zhvillua sot, Golemi u shpreh se Zamira Rami kishte punësuar në bashkinë e Gjirokastrës kryetarin e LSI-së së Përmetit, ndërsa në ditët e fundit mori një sërë vendimesh duke firmosur kontrata miliona lekë.
“Gjeta në bashki punonjës që nuk kishin ardhur kurrë në punë, jemi e vetmja bashki që kishim të punësuar 2 gazetarë. Gjeta kryetarin e LSI në Përmet që paguhej nga bashkia si nëndrejtor i agjensisë se mirëqënies sociale. 90% e financave janë shpenzuar në 6 muaj nga buxheti i vitit të kaluar. Abuzimet në bashkinë e Gjirokastrës nga ish- kryebashkiakja kanë qenë të mëdha. Kontrata miliona lekë janë firmosur nga Zamira Rami, një ditë para se të merrja detyrën ka firmosur një kontratë që duhet ta garantojë tashmë bashkia e re. 210 mije lekë për të hapur një gropë për të varrosur të vdekurit.
Kontrata për varrezat e nënshkruar nga kryebashkiakja për të favorizuar të afërm të saj që kanë pronësi agjenci funerale”, u shpreh Golemi.
