Në Gjirokastër ishte sot për një vizitë shkrimtari austriak Robert Menasse. Ai u prit nga kryebashkiaku Flamur Golemi, i cili i dhuroi në mënyrë simbolike “Çelësin e Qytetit”.
“Në Gjirokastër kishim sot një mysafir të veçantë; shkrimtarin, publicistin dhe politologun Robert Menasse. Një personalitet i kulturës europiane, i cili është nderuar me shumë çmime për veprat e tij, duke përmendur këtu “Kalorësi i Legjionit të Nderit” për art dhe letra në Francë, “Kryqi i Artë” i Austrisë dhe plot çmime të tjera. I jam mirënjohës që zgjodhi të vizitonte Gjirokastrën së bashku me bashkëshorten Elisabeth dhe pata kënaqësi t’i dhuroja “Çelësin e Qytetit”, thotë Golemi teksa publikon fotot me shkrimtarin.
Robert Menasse shoqërohej në këtë vizitë nga deputeti socialist Fate Velaj. Menasse është gjithashtu një mik i shkrimtarit tonë Ismail Kadare. Pritet që në muajt e ardhshëm shkrimtari austriak të shkruajë një libër mbi rrugëtimin e Shqipërisë drejt hapjes së negociatave me Bashkimin Europian.
©argjiroja.net
