Në mbledhjen e sotme të Këshillit Bashkiak Gjirokastër, kryetari Flamur Golemi foli ndër të tjera edhe për nivelin e lartë të nepotizmit që ai ka gjetur në bashki. Vec kryetarit të LSI-së në Përmet, i cili ishte punësuar si nëndrejtor i Komunales Gjirokastër, Golemi tregoi edhe raste të tjerë.
“Po specialist të marrëdhënieve me publikin në po të njëtën agjenci kishit dëgjuar më parë? Pra, PR i ndërmarrjes komunale. Kulmi! Ka plot raste të tilla, njerëz të regjistruar nga partia që merrnin rrogën kot pa shkuar asnjë ditë në punë. Njerëz që nuk e kanë parë punën me sy, por i ka parë vetëm bankomati i bankës sa për të marrë rrogën”, tha Golemi.
Në vijim të kësaj ai foli edhe për nëpunës që fshihen pas raporteve mjekësore, por nuk përmendi emra.
“Parazitizmi dhe nepotizmi do të marrë fund në Bashkinë Gjirokastër. Edhe ata që vazhdojnë fshihen pas raporteve mjekësore, shpesh dhe fiktive, nuk shpëtojnë dot nga ballafaqimi me të vërtetën dhe taksat e gjirokastritëve. Sado raporte mjekësore të marrin nuk ia hedhin dot. Edhe leje lindje të marrin, pavarësisht se janë burra, sërish nuk i shmangen dot përgjegjësive”, tha Golemi.
Ndonëse kryebashkiaku përmendi disa raste, sipas tij të abuzimit me taksat e qytetarëve përmes të punësuarve pa kriter, e udhës do të ishte që këto të mos mbeteshin thjesht retorikë. Nëse ai është bindur se është shkelur ligji, ka detyrimin të shkojë në Prokurori.
Në këtë mënyrë mund të bëhen më shumë të besueshme ato që thotë Golemi. Po kështu mbetet për t’u parë se sa larg nepotizmit do të qëndrojë vetë Flamur Golemi në një qytet të vogël, ku njerëzit kanë lidhje të afërta me njëri-tjetrin.
©argjiroja.net
