Vijnë informacionet e para për vendndodhjen e Maradona Ibrahimit nga Gjirokastra, pas apelit për ndihmë të nënës pak ditë më parë në emisionin Pa Gjurmë në Report Tv. Mbrëmjen e sotme një person telefononi në emisionin Pa Gjurmë. Ai tha se Maradona Ibrahimi është parë në Sarandë pak ditë më parë në rrugë dhe në një market.
“Maradona është parë dhe ndodhet në Sarandë. Është parë me bluzë të bardhë dhe xhinse. Deri diku ka qenë alkoolist. Është parë në datë 16 shtator, por edhe më vonë te një market.
Ai është parë live, por nuk është se kam bërë ndonjë komunikim. Ka një tatuazh në këmbë. Pak a shumë e kam njohur edhe në Gjirokastër te shkolla Pedagogjike. Jam i sigurt për informacionin, pasi kam pirë edhe ndonjë kafe kur isha në Gjirokastër. Kishte probleme, bërtiste në rrugë, por u shmanga” tha ai.
30-vjecari Maradona Ibrahimi nga Gjirokastra rezulton i humbur prej datës 1 gusht të këtij viti. Ai foli për herë të fundit me nënën e tij duke i thënë se do të shkonte të pinte një kafe tek “Ura e Lumit” në Gjirokastër dhe se do të kthehej në banesë. Por kjo nuk ndodhi. Pak orë nga zhdukja, nëna e tij, Marie dëgjoi zërin e të birit përmes një telefonate.
Një muaj para se të humbte gjurmët, ai pati shfaqur probleme me shëndetin mendor si rezultat i përdorimit të lëndëve narkotike dhe kurohej në Tiranë./ Report tv
