Paniku vazhdon në qarqet e Tiranës dhe Durrësit, ndërsa interpretimet për tërmetin kanë shkaktuar më shumë panik se vetë tërmeti. Lëkundjet që vazhdojnë, ndonjëherë bëhen më të forta për t’u dhënë zë “parashikuesve” të apokalipsit.
Por si është e vërteta? A rrezikohemi nga një goditje e tillë?
Ka patur vetëm një tërmet tektonik
Goditja e të shtunës e orës 16.04, me magnitudë 5.8 ishte e vetmja, sipas sizmiologëve shqiptarë dhe të huaj. Nuk pati më lëvizje tektonike, por vetëm vazhdim i lëkundjeve, në masë më të madhe ose më të vogël.
Lëkundja e dytë e fortë të shtunën, vetëm 10 minuta pas të parës, ishte rrjedhim i goditjes, por jo një goditje tjetër.
Të gjitha lëkundjet deri në 00:30 të së hënës janë pasoja të goditjes së parë. Sizmiologët e quajnë të kaluar rrezikun nga goditja e së shtunës, ndërsa bëjnë thirrje për kujdes gjatë lëkundjeve të tokës që vazhdojnë si pasojë.
Të parashikosh një goditje tjetër të fortë është e pamundur, por rreziku nga goditja e së shtunës mund të quhet i tejkaluar.
Pse ndihen lëkundjet?
Sipas sizmiologëve, lëkundjet janë normale për shkak të tërmetit që shkaktoi goditja tektonike. Ato janë përcjellje e një vale, të ngjashme me jehonën e zërit, që vazhdon derisa humbet, diku më e fortë diku më e dobët, në varësi të dendësisë apo vakuumit. Ndërkohë që epiqendra e lëkundjeve lëviz, edhe thellësia është me e vogël, duke bërë qëlëkundjet të ndihen më shumë në zonat afër epiqendrës dhe të duken si tërmete të mëdha.
A ka rrezik nga lëkundjet?
Sizmiologët sqarojnë se rreziku ka kaluar. Vetëm shtëpitë që kanë dëmtime në strukturën e ndërtimit rrezikohen nga lëkundjet. Ato që nuk kanë pësuar gjë nga goditja e së shtunës, janë tashmë të sigurta. Është shqetësuese kur ndodhin, por nuk rrezikohet rrëzimi i asnjë ndërtese.
