Janë plot 100 objekte që do shkatërrohen në Radhimë, sipas një plani të Inspektoriatit Kombëtar të Mbrojtjes së Territorit. Por ky vendim ka irrituar pronarët e bizneseve në këtë zonë, të cilët në parim janë dakord me prishjen e ndërtimeve pa leje, por kërkojnë të dinë më shumë detaje rreth projektit dhe se çfarë do të bëhet me pronat e tyre.
Sipas pronarëve të bizneseve, IKMT ka vendosur të prishë të gjitha ndërtimet përgjatë vijës bregdetare, por pa specifikuar nëse do të ketë apo jo dëmshpërblime për ata që kanë qenë në proces legalizimi, apo të tjerë me leje të posaçme nga autoritetet e qeverisjes vendore.
Situata paraditen e sotme nuk ka qenë e tensionuar edhe pse Policia ka qenë prezente për të ndihmuar inspektoriatin në kryerjen e detyrës. Pavarësisht nga kjo, pronarët e bizneseve janë në pritje të një vendimmarrjeje se çfarë do të bëhet në të ardhmen me ta, nëse do të jepen apo jo leje për ndërtime në zonën bregdetare.
