Fredi Bejleri, i akuzuar për masakrën e Peshkëpisë në fillim të viteve ’90, ka komentuar meshën e mbajtur në Bularat në mediat greke dhe shqiptare. Kur u pyet se çfarë mendonte për masat e marra nga policia, ai tha për mediat e vendit fqinj se nuk janë treguesi i mirë demokracie, duke shtuar se kemi të bëjmë me një klimë të ftohtë.
Fredi Bejleri: “Kemi të bëjmë me një klimë të ftohtë. Ky nuk është tregues i mirë demokratik. Edhe ndalimet në Kakavijë.”
Ndërsa për mediat shqiptare Bejleri kërkoi nga qeveria që të zbardhë sa më shpejt ngjarjen si edhe u shpreh se minoritetet greke në Shqipëri janë po aq të sigurt sa edhe shqiptarët.
Fredi Bejleri: “Akoma nuk dalë rrethanat e ekzekutimit të tij. Kemi ardhur të ngushëllojmë familjen në mënyrë paqësore. Nuk ka asnjë incident, njerëzit janë paqësore në kishe dhe tek varreza. Është detyra jonë të ngushëllojmë familjen kushdo qofshin rrethanat e ngjarjes. Qeveria të zbardhë sa më shpejt ngjarjen.
Minoritarët në Shqipëri janë aq të sigurt sa janë edhe pjesa tjetër e popullit shqiptar. Ka probleme në mos zbatimin e drejtat e njeriut si arsimimi në gjuhën amtare greke, pronat kryesisht në Himarë. Marrëdhëniet mes minoritarëve greke dhe shqiptarëve janë përmirësuar.”
Deri tani numri i të ndaluarve nga policia shqiptare në kufirin e Kavavijës ka shkuar në 18. Tetë prej tyre ishin shpallur non grata.
Raportohet se në 24 orët e fundit kanë hyrë në Shqipëri rreth 1900 shtetas grekë.
