Ndërkohë që në fshatin Bularat të Gjirokastrës zhvillohej ceremonia për 1-vjetorin e vdekjes së Kostandin Kacifan, në sheshin “Çerçiz Topulli ‘’ në Gjirokastër po protestohej. Të ardhur nga disa treva shqiptare, dhjetra të rinj ngritën zërin kundër qëndrimeve antishqiptare nga ana e ekstremistëve grek.
Në protestën me flamuj e simbole kombëtare kundërshtohej edhe reagimi jo i duhur i shtetit shqiptar, ku sipas protestuesve nuk duhet të lejohet të përsëritet dhunimi dhe keqpërdorimi që fqinjët i bëjnë tolerancës së shqiptarëve.
Ata bënë thirrje që të merren masat e duhura për të ndaluar një protestë të mundshme anti-shqiptare. Edhe sot, nëna e ekstremistit Kacifas, të vrarë nga RENEA pas sulmit të armatosur ndaj policisë një vit më parë në Bularat, bëri thirrje për luftë teksa ju drejtua të rinjtë që të rrëmbejnë armët e të luftojnë për tokën e tyre që sipas saj është greke dhe të bashkohen me Greqinë.
