Patëllxhani, pjeshka dhe bulëzat e ujit nuk do të jenë më pjesë e simboleve që mund t’u dërgoni miqëve tuaj virtualë në Facebook dhe Instagram si pjesë e një fotoje. Dy platformat më të mëdha të rrjeteve sociale kanë bllokuar këto “emoji” pas qortimeve të një pjese të madhe të përdoruesve për përmbajtje të fortë seksuale dhe që shpesh keqkuptohen si joshje, apo ofertë për marrëdhënie intime.
Pjesë e personave që akuzoi këto rrjete sociale se po u shkaktonte vuajtje dhe stres, sidomos burrave të martuar, ishte edhe këngëtari Kanye West. Por, për shumë përdorues të tjerë ky nuk duhet të jetë shqetësimi kryesor i Facebook dhe Instagram.
Me mijëra komente nëpër faqe të ndryshme akuzojnë Facebook dhe Instagram për hipokrizi dhe përpjekje për të hequr vëmendjen nga problematikat reale madhore të këtyre dy platformave, siç është racizmi, gjuha e urrejtjes, propaganda dhe lajmet e rreme.
Facebook thotë se arsyeja se pse tre simbolet po bllokohen është se po përdoren gjithnjë e më shumë për të sugjeruar aktivitet seksual, sidomos duke i vendosur këto “emoji” nëpër foto gjysmëlakuriq nga përdoruesit e dy rrjeteve sociale.
Udhëzimi i nxjerrë nga Facebook dhe Instagram lejon përdorimin e tyre gjatë bisedave me tekst, por jo në një mënyrë që mund të nënkuptojë diçka seksuale.
Por si do ta bëjë Facebook dhe Instagram dallimin nëse këto simbole janë përdorur me nënkuptim seksual apo jo gjatë një bashkëbisedimi?
Për këtë, kompanitë thonë se do të shtojnë së shpejti një sektor ku përdoruesit mund të raportojnë përmbajtjen e bisedave, që në këndvështrimin e tyre janë me përmbajtje seksuale dhe të besdisshme.
Sipas “The Daily Dot”, një faqe e specializuar në fushën e teknologjisë dhe të lundrimit të sigurtë në internet, ndryshimet kanë nisur që prej fillimit të shtatorit dhe janë finalizuar më 24 tetor. Një tjetër arsye që çoi Facebook dhe Instagram që të ndërmerrnin këtë hap ishte edhe përdorimi gjithnjë e në rritje i dy platformave dhe këtyre simboleve nga ana e punonjësve të seksit, në shumë vende ku prostitucioni është i legalizuar.
