Kryetarja e Bashkisë së Durrësit, Valbona Sako, që erdhi në këtë detyrë pas zgjedhjeve të 30 qershorit, ka lajmëruar sot dorëheqjen nga detyra. Ky vendim, vjen siç thotë ajo, pas shumë komenteve që u bënë dje në media, lidhur me dy prononcime të papërshtatshme, përsa i takon krizës së tërmeteve dhe trajtimin e të prekurve.
Mesazhet e Sakos, ishin pjesë të shkëputura nga intervista e saj në media, ku në një moment ajo shprehej se duhet të jemi të lumtur që kemi vetëm 50 viktima, dhe në një moment tjetër, ajo thoshte se, këta zotërinj (pra të prekurit nga tërmeti), po i çojmë në hotele, ku as nuk do të mund të shkonin me pushime.
Edhe pse ndoshta të nxjerra nga konteksti, këto dy fjali të kryebashkiakes Sako sollën një tërmet dje në media, dhe komentet ishin të furishme dhe mjaft kritike. Në këtë situatë, Sako ka lajmëruar dorëheqjen. Këtë akt, ajo e ka bërë publik, përmes një statusi në Facebook.
