Detaje te reja nga grabitja qe ndodhi ne banesen e familjes Basho ne fshatin Terihat te Bashkise Dropull. Persona ende të paidentifikuar, bën me dije policia, kanë hyrë në banesë rreth orës 03:30, duke marrë prej aty një sasi parash. Ata janë larguar dhe po punohet për identifikimin e kapjen e tyre. Pronari i banesës, Vasil Basho jeton në Greqi dhe është informuar mbi ngjarjen. Ai është nisur me urgjencë drejt fshatit për të mësuar më shumë mbi ngjarjen.
Në banesë mësohet se ka qenë vetëm vjehrra e tij me një grua tjetër të moshuar, fqinje, e cila rrinte me 80-vjeçaren per t’i bere shoqeri. Jorgjia Ruci, 89 vjec thotë se dëgjoi zhurmë dhe dikë që e prekte në fytyrë. Kujtoi se ishte shoqja e saj.
“Pastaj më zunë gojën. Bërtita, doja të hapja dritaren, por ata prenë litarin e grilës. Më shtynë dhe më mbyllën në dhomë. Pastaj kthyen shtëpinë përmbys“, tregon e moshuara.
Sakaq, lidhur me shumen e grabitur, sipas pohimeve të pronarit në banesë kishte 1500 euro dhe rreth 80 mijë lekë të rinj.
Tre grabitësit kishin maska dhe ishin të armatosur. Familjaret thone se ata kanë marrë edhe një valixhe me dokumente, e cila ka qene e mbyllur. Policia ka bere shoqerimin ne komisarit te 8 personave, nga fshati dhe zona perreth, por ende nuk ka rënë në gjurmët e autorëve. Argjirolajm.net sjell foto nga brenda shtëpisë ku sic shihet grabitësit kanë kthyer përmbys cdo gjë për të gjetur paratë.
Njoftimi i policisë Gjirokastër për ngjarjen
Rreth orës 03:30, në fshatin Terihat, Bashkia Dropull, persona ende të paidentifikuar, kanë hyrë në banesën e shtetasit V.B., ku ndodheshin dy të moshuara dhe kanë marrë një sasi parash dhe janë larguar.
Në vendngjarje ka shkuar grupi hetimor, ku vijojnë veprimet për zbardhjen e ngjarjes, identifikimin dhe kapjen e autorëve.
