Ditën e djeshme në Derviçan të Gjirokastrës u festua përvjetori i 29 i organizatës Omonia, ku ndodheshin edhe përfaqësuesit e Qeverisë së Greqisë.
Të pranishëm nga qeveria greke ishin zv/ministri i Jashtëm grek Konstantinos Vlasis, deputeti i Demokracisë së Re Dimitris Jojas si dhe deputeti i Syrizas Aleksis Katsis.
Ndërsa nga Shqipëria, prezente ishte ambasadorja greke në Tiranë Sofia Filipidhu, konsulli grek i Gjirokastrës Lambros Kakisis. Gjithashtu i pranishëm ishte edhe kryetari i PBDNJ Vangjel Dule, por edhe kryetari i Bashkisë së Dropullit Dhimiter Toli, i cili i përket PS-së dhe ish-kreu i OMONIA-s, Fredi Bejleri.
Fillimisht në ceremoninë hapëse nga kreu i OMONIA-s, Vasil Kajo janë lexuar telegramet e urimit të presidentit grek Prokopis Pavlopulos dhe të kryeministrit grek Mitsotakis. Më pas, ish-deputeti Vangjel Dule ka mbajtur një prononcim për mediat duker u shprehur se qeveria e kryeministri Edi Rama nuk i ka respektuar të drejtat e minoritetit grek.
“Pavarësisht përpjekjeve sistematike 29-vjeçare të OMONIA-s që lidhet me ruajtjen e identitetit dhe të drejtat e tyre në legjislacion sikur kërkohet nga ndërkombëtarët, ende me keqardhje konstatojmë se gjatë qeverisjes aktuale shënohen hapa që nuk kanë lidhje me realitetet e reja europiane. Qeveria e zotit Rama që sot mban kryesimin e OSBE-së ka dështuar t’u përgjigjet kërkesave të kohës. Që prej 2017-ës muaji tetor, parlamenti votoi një ligj për të drejtat e minoriteteve nuk i përgjigjej kërkesave të kohës, megjithatë deri sot nuk është marrë asnjë hap konkret. Pas regjistrimit të dështuar të 2011, ende ligji mbetet problematik dhe i paamenduar sipas kërkesave të Këshillit të Europës. Sfidë është regjistrimi i ardhshëm i popullsisë. Prona e minoritetit grek në breg të Jonit dhe zona të tjera janë objekt abuzimesh të vendimeve qeveritare dhe Ramës. Probleme me vendosjen e tabelave dygjuhëshe janë edhe më tepër problematike,“-tha Dule.
Më tej, Dule rikujtoi edhe njëherë minoritarin e vrarë në Bularat, Konstandinos Kaçifas, duke u shprehur se për të nuk ka ende një informacion zyrtarë për mënyrën se si u ekzekutua nga forcat RENEA.
“Ende nuk kemi një relacion zyrtar për vrasjen e Kostandin Kaçifas në tetorin e 2018. Problemet e minoritetit grek është shumë larg së qeni një realitet europian. Të gjithë pjesëtarët e minoritetit grek mbi identitetin partiak që ndajën të njëjtin vizion për objektivat janë të mirëpritur,”– e mbylli kreu i PBDNJ-së.
Ç’është OMONIA?
OMONIA është një organizatë me natyrë politike dhe kulturore që promovon të drejtat e minoritetit grek në jug të vendit. Organizata u themelua në vitin 1991, pas rënies së regjimit komunist, në fshatin Derviçan nga përfaqësues të minoritetit grek në jug. Vitet e fundit, kjo organizatë ka marrë një natyrë radikale duke bërë thirrje shpesh herë për bashkimin e jugut të vendit me Greqinë.
