Nëna e Eleni Topaloudi, studentes 21-vjeçare nga ishulli i Rodosit, nuk e ka përmbajtur veten para dy të pandehurve, të cilët akuzohen për vrasjen e vajzës së saj.
“Vrasës, unë do të marr jetën tuaj, ju keni shkatërruar jetën tonë dhe jetën e fëmijës tim dhe unë duhet të rri dhe t’ju shoh këtu. Vrasës!”– ka thënë nëna gjatë seancës duke u çuar dhe duke dalë jashtë.
As babai i 21-vjeçares nuk ka ndenjur i qetë duke ‘shpërthyer’ ndaj dy të rinjëve, njëri prej të cilëve është me origjinë shqiptare.
“Ju nuk keni turp as pak, për çfarë konsensusi po flisni? Me thikë në fyt ju e përdhunoni … Vajza jonë ishte “e pafat”, nëse nuk do ishte Eleni do të ishte një vajzë tjetër,”- është shprehur ai.
Të dy prindërit janë shprehur që trupa gjykuese mos të ketë mëshirë për dy të rinjtë duke kërkuar për ta dënimin maksimal.
Trupi i 21-vjeçares u gjet i hedhur në shkëmbinj në det nga dy të rinj. Pasi ishte dhunuar nga dy të rinjtë, ata i kishin lidhur këmbët, e kishin goditur në kokë dhe më pas trupin e kishin hedhur në det. Pavarësisht plagëve të marra, sipas ekspertizës mjeko-ligjore vdekja e Elenit ishte shkaktuar nga mbytja, çka do të thotë se studentja ka qenë gjallë në momentin kur e hodhën në det. Të dy djemtë, si Aleksandër Luca po ashtu edhe i riu grek, ia kanë hedhur fajin njëri-tjetrit duke mos e marrë përsipër krimin.
