Televizioni Top Channel dhe TV Star News në Greqi janë përplasur rreth një raporti të gazetares Ilnisa Agolli, për fshatin Dervician. Gazetarja, e cila promovon fshtrat turistike shqiptarë, kishte theksuar se Derviciani ishte një fshat ku shqipja refuzohej. Ndaj saj ka pasur reagime më herët nga një blogere dhe përkthyese e njohur shqiptaro- greke me origjinë nga Derviciani.
Por TV Star News i Greqisë duket se ka ashpërsuar gjuhën ndaj këtij raporti dhe ndaj gazetares në fjalë.
Disa blogje nacionaliste greke kanë kërkuar shpalljen e saj “Non grata” në Greqi. Në kronikën e Star News përmendet edhe Argjirolajm.net për një shkrim të botuar, ku kritikohej qasja e gazetares Ilnisa Agolli në emisionin e përgatitur për fshatin Dervician. Shkrimi në me titull “Letër nga fshati që refuzon të flasë shqip” kishte për autore Elena Zhakon dhe ishte marrë nga blogu ‘Peisazhe të Fjalës’. Natyrisht që ne ndanim të njëjtin qëndrim me autoren e shkrimit prandaj e botuam atë. Afërmendsh që minoriteti do të flasë në gjuhën e vet, ky nuk është lajm e as mëkat, por një e drejtë e tyre legjitime.
Ne besojmë se ky emision ishte një shans i humbur për të treguar më mirë kulturën, historikun dhe jetën në fshatin Dervician, më i madhi i minoritetit grek në Dropull. Nga ana tjetër dënojmë me forcë cdo linçim që i bëhet gazetares nga mediat në vendin fqinj apo kushdo tjetër. Kjo nuk i kontribuon bashkëjetesës së shkëlqyer që ekziston mes nesh dhe minoritetit, si dhe harmonisë që duhet të kenë dy vendet.
Besojmë gjithashtu se për emisionin në fjalë nuk kishte ndonjë skenar të paracaktuar për ta trajtuar në atë mënyrë, por më së shumti kemi të bëjmë me mungesë të njohurisë nga ana e gazetares së Top Channel për zonën e minoritetit dhe ndoshta paragjykim i saj personal. Do të ishte e udhës që ky emision përpara se të transmetohej të kalonte në disa filtra të tjerë redaksionalë. Shihni më poshtë videon e kronikës së transmetuar në Star News.
©argjiroja.net
