Detaje të reja bëhen me dije lidhur me bllokimin e një mjeti në doganën e Qafë-Botës ditën e djeshme, ku u zbulua lëndë narkotike. Burime zyrtare nga policia konfirmuan se sasi e drogës e sekuestruar ishte 63.7 kg kanabis ndërsa në pranga është vënë drejtuesi i mjetit ku u gjet sasi e lëndës narkotike, Arsen Hoxha.
Aksioni
Policia njoftoi se shërbimet e Policisë Kufitare kanë kaluar në vijën e dytë për një kontroll më të detajuar një automjet tip “Mitsubishi” ku dyshohej se mund të transportohej lëndë narkotike.
Pas kontrollit të imtësishëm të ushtruar nga shërbimet e Policisë Kufitare, në bashkëpunim me ato doganore me ndihmën edhe të qenit antidrogë, në automjetin në fjalë është konstatuar se në pjesën e poshtme të dyshemesë ishte hapur një vend i posaçëm për fshehjen e lëndes narkotike.
Pas konstatimit, specialistët e narkotikëve kanë nxjerrë disa pako me lëndë narkotike të cilat pas peshimit kanë rezultuar të jenë 63.7 kilogramë të llojit kanabis sattiva.
Në përfundim të veprimeve proceduriale, specialistët për hetimin e narkotikëve kanë arrestuar në flagrancë drejtuesin e mjetit shtetasin Arsen Hoxha, 40 vjeç, lindur në fshatin Cakran, Fier dhe banues në Sarandë.
Materialet, njoftoi Policia, do t’i referohen Prokurorisë pranë Gjykatës së Shkallës së Parë Sarandë për veprën penale “Trafikimi i lëndëve narkotike”.
e
