Erozioni dhe rrëshqitjet e tokës në zonën e Gjirokastrës janë kthyer në problematike për komunitetin. Gjatë dimrit që lamë pas, u regjistruan disa raste problematike të rrëshqitjeve të tokës, të cilat rrezikuan edhe jetën e banorëve. “Harta e Qarkut të Gjirokastrës përfshin disa zona problematike, përsa i takon dukurive tektonike.
“Gjatë stinës së dimrit në qytetin e Gjirokastrës, fshatin Picar, etj ne konstatuam rrëshqitje problematike të dherave, të cilat dëmtuan edhe disa banesa”, pohon drejtori i degës së Gjeologjisë, Çano Nora. Një prej rasteve problematike të erozionit u regjistrua në lagjet e vjetra të qytetit të Gjirokastrës. Shkarja e masiveve të dheut dëmtoi disa banesa që ndodheshin në lagjen Cfakë, duke rrezikuar edhe jetën e banorëve.
“Gjatë stinës së dimrit masive të tëra dheu shkëputeshin nga kodra mbi shtëpinë tone, duke përfunduar më pas fare pranë mureve të banesës. Në disa raste u detyruam të largojmë me ekskavator baltën që mbulonte oborrin e shtëpisë”, thotë B. Rondo, banor i lagjes.
Sipas gjeologëve, shkak i kësaj situate problematike ishte prerja pa kriter e pemëve në këtë pjesë të qytetit. “Problematika të rrëshqitjeve të tokës u regjistruan edhe në fshatin Picar, ku si shkak i erozionit u dëmtuan edhe muret e disa banesave”, shprehet gjeologu Çano Nora.
Në këtë fillimpranvere, specialistët e gjeologjisë kanë nisur bashkëpunimin me pushtetin vendor për zbatimin e projekteve publike për frenimin e problematikës së erozionit. “Ne i kemi parë nga afër situatat e krijuara për banorët si shkak i erozionit gjatë dimrit, dhe në bashkëpunim me degën e Gjeologjisë si edhe Emergjencat Civile po ndërhyjmë me financime për mospërsëritjen e problematikave të tilla në të ardhmen”, shprehen specialistët e Emergjencave në Bashkinë Gjirokastër.
“Në bashkëpunim me Drejtorinë e Përgjithshme të Shërbimit Gjeologjik si dhe me pushtetin vendor ne kemi hartuar studimet dhe projektet përkatëse për të ndërhyrë ne zonat e rrezikuara nga rrëshqitjet e tokës, duke përmirësuar sistemin e drenazhimit të ujrave sipërfaqsore në këto zona, ndërtimin e mureve mbajtesë si edhe pyllëzimin masiv të tyre”, shprehet drejtori i degës së Gjeologjisë Ç. Nora. Sipas gjeologëve problematike mbeten ndërtimet e reja në zona të pastudiuara nga ana tektonike.
“Në shumë raste banorët i ndërtojnë godinat e reja, pa u konsultuar me specialistët e gjeologjisë, duke bërë që ndërtime të tilla të jenë të rrezikuara nga erozioni dhe rrëshqitjet e tokës”, apelojnë gjeologët në Gjirokastër.
Shirrat e rrëmbyeshëm të ditëve të fundit, kanë shkaktuar rrëshqitjet e masiveve të dheut, kryesisht në zonat malore të rrethit të Gjirokastrës. Madje, si shkak i shembjeve të tokës ka patur raste kur është rrezikuar jeta e njerëzve si dhe janë dëmtuar shtëpi banimi. Si shkak i erozionit dhe rrëshqitjeve të tokës në fshatin Picar, Gjirokastër janë dëmtuar gjashtë shtëpi banimi.
Sipas kryetari të komunës Shkëlqim Guçe, në tri prej këtyre shtëpive banojnë njerëz, ndërsa tre të tjera janë të boshatisura si shkak i largimit përpara disa vitesh të familjarëve të tyre. Si shkak i shëmbjeve të dheut në këto banesa janë shfaqur plasaritje dhe çarje të ndryshme në muret e tyre. Drejtori i Ndërmarrjes Gjeologjike në Gjirokastër, Çano Nora thotë se krahas shirave të rrëmbyeshëm në shembjet e dheut kanë ndikuar edhe formacionet e dobëta gjeologjike të tokës në këtë zonë të Picarit.
“Banesat e dëmtuara janë ndërtuar përpara shumë vitesh kështu që edhe si shkak i amortizimit të tyre ato mund të përbëjnë rrezik për banorët që jetojnë në to”, thonë specialistët gjeologë./konica.al
