Partizani ka marrë fitoren e parë të këtij viti, po ashtu edhe e para në stol për trajnerin Adolfo Sormani. Të kuqtë nuk hasën pengesa në transfertën e Gjirokastrës përballë Luftëtarit. Bluzinjtë nuk mund të bënin rezistencë teksa një dorë në këtë humbje iu dha edhe portieri i tyre, Arlis Shala. I sapoardhuri në këtë merkato të janarit u aktivizua si titullar nga trajneri Çoçlli, por nuk justifikoi besimin e këtij të fundit. Sapo u regjistrua minuta e dytë, Shala grushtoi topin por nuk e largoi nga zona, teksa i gjendur aty pranë Solomon nuk e pati të vështirë për të realizuar golin e parë.
Ndërkaq, kryeqytetasit nuk e ulën ritmin dhe vazhduan insistimin drejt portës kundërshtare për të gjetur edhe golin e dytë me anë të Brojës. Mesfushori goditi nga jashtë zonës ndërsa sërish portieri Shala mund të bënte më mirë. Më avantazhin e dyfishtë të “demave” u mbyll pjesa e parë. Ndërkohë, në fraksionin e dytë, Partizani gjeti edhe golin e tretë. Ai që siguroi triumfin ishte Uilliam Kordeiro i cili me një goditje kirurgjikale nuk i la asnjë shans reagimi portierit Shala.
Deri në fund rezultati nuk ndryshoi dhe Partizani mori tre pikë të vyera për të dalë nga kriza. Hera e fundit që të kuqtë merrnin tre pikë të plota ishte në dhjetorin e vitit të kaluar në sfidën ndaj Vllaznisë. Tashmë, Partizani ngjitet në vendin e tretë me 31 pikë në pritje edhe të ndeshjes së Teutës. Nga ana tjetër, Luftëtari mbetet në pozita të rënduara teksa klasifikohet në vendin e parafundit me vetëm 12 pikë të grumbulluara.