Gjykata e Vlorës la sot në burg Bardhosh Mino Lytaj, i arrestuar dy ditë më parë nga policia e qytetit bregdetar pasi rezultonte i dënuar me burgim të përjetshëm në Greqi për vrasjen e dy turistëve anglezë në shtetin fqinj. Ai akuzohet gjithashtu edhe për trafikim të lëndëve narkotike.
Seanca gjyqesore është drejtuar nga gjyqtare Herila Cela ndersa prokuror i ceshjes eshte Saimir Smaka.
Në gjyq, i arrestuari është shprehur i revoltuar dhe me shenja nervozizmi: “Kam kryer burg në Greqi. Nuk e dija që isha në kërkim. Jam martuar, madje edhe me fëmijë”, raporton korespondenti i Panorama në Vlorë.
NJOFTIMI DITEN E ARRESTIMIT NGA POLICIA
Në zbatimin e planit të masave për kapjen e personave në kerkim, bazuar në informacione të marra në rrugë operative, Sektori i Hetimit te Krimeve në bashkëpunim me Forcat Operacionale në DVP Vlorë, kanë finalizuar operacionin “Bianco” mbi bazën e të cilit është bërë kapja dhe ndalimi i shtetasit në kërkim:
B.M (L), 47 vjeç, banues në Vlorë.
Ky shtetas ishte shpallur në kërkim në Shtator të vitit 2019, pasi Prokuroria Vlorë ka dërguar urdhërin për ekzekutimin e vendimit penal nr.196, datë 06.08.2019 të Gjykatës së Rrethit Gjyqësor Vlorë, mbështetur edhe nga të dhënat e dërguara nga shteti Grek, ka vendosur masën e sigurisë “Arrest në burg” për veprat penale:
“Vrasje me dashje, kryer në bashkëpunim”, “Grabitje në bashkëpunim”, “Armëmbajtje pa leje”, “Përdorim i paligjshëm i armës”, “Zotërim dhe transportim i një sasie të madhe të lëndëve narkotike”, dhe “Falsifikim”, të parashikuara sipas kodit Penal të shtetit Grek.
