Kryetari i Partisë Demokratike, Lulzim Basha vazhdon turin e tij me ‘Po të dëgjoj’ nëpër lagjet e Tiranës, ku takon qytetarë të ndryshëm dhe i pyet ata për problemet që hasin çdo ditë.
Ditën e sotme, lideri demokrat ka publikuar në rrjetet sociale një video nga disa momente që ka kaluar me gjyshe Verën, me të cilin postoi edhe një foto disa ditë më parë, Vera i ka treguar kreut të PD-së jetën e vështirë me djemtë dhe nuset pa punë dhe me një pension minimalist, i cili nuk i del as për të paguar dritat, të cilat kapin vlerën e 12 mijë lekëve të reja.
“Me gjyshe Verën kalova një paradite të gjatë duke e dëgjuar për hallet dhe problemet me të cilat ajo dhe familja e saj përballen çdo ditë”, shkruan Basha në mbishkrimin e videos.
Gjatë dialogut Basha e pyet për pensionin, dhe Vera i përgjigjet ‘182 mijë lekë’, ndërkohë që kur hyjnë sërish në shtëpi, Basha e pyet sërish për pensionin, pasi me siguri e ka harruar çka i tha më parë. Pasi dëgjon shifrën e 182 mijë lekë, kryedemokrati nervozohet dhe përplas librezën me inat mbi tavolinë, dhe shton se në këtë vend “nuk ka më dinjitet”.
Dialogu i Bashës me Verën:
Vera: Ckemi Luli.
Basha: Si janë nga shpia?
Vera: Mirë si papunë. Kam pagu drita 100 e ca mijë lekë, pa ujë. Ujin se kam paguar se nuk më doli pensioni. Unë marr një pension 180 mijë lekë.
Basha: Pra ty të shkon mbi gjysma e pensionit për dritat…
Vera: Po ilaçet?
Basha: Me gjithë këto pagesa që bën, çfarë arrin të blesh?
Vera: Ça do blej, dy patëllxhana, dy kunguj, qepë dhe patate. Se s’të del.
Basha: Si e ka emrin furrxhiu i lagjes?
Furrxhiu: Skerdi.
Basha: Të lumshin duart Skerdi.
Vera: Kjo është rutina e të gjithë nënave shqiptare, ku të bredhin për 5 lekë…
Basha: Këto të dyja të shkojnë 130 mijë. Sa e pensionin?
Vera: 182 mijë lekë
Basha: Sa të shkojnë ilaçet?
Vera: 40 mijë. Se i ka këto kusure mosha.
Basha: Se kam dhe prindërit me ilaçe.
Vera: Jo, jo.
Basha: Me këto që më thua ti, s’ka vend as për dinjitet, as për dinjitet s’ka vend (Përplas librezën mbi tavolinë me nerva).
Vera: Edhe shumë faleminderit se na bleve shegët…
Basha: Po ça bleva shegët…
Jemi kuriozë për formulën sesi ia del gjyshe Vera të kalojë muajin me 182 mijë lekë të vjetra pension, kur vetëm dritat, uji dhe ilaçet i shkojnë 182 mijë fiks, dhe kur të gjithë në shtëpi thotë se i ka të papunë…
