Rreth një vit e gjysmë nga vdekja e Kostandin Kacifas, në media publikohet lajmi se nga hetimet nga ka rezultuar se minoritari grek nuk është vrarë gjatë shkëmbimit të zjarrit me policinë shqiptare, por ka kryer vetëvrasje.
Sipas raportit të publikuar në media, pas ngjarjes dosja për këtë çështje nga prokuroria e Gjirokastrës u transferua në Prokurorinë e Krimeve të Rënda.
Dhe pikërisht mediat i referohen këtyre hetimeve të kryesuara nga prokurori Njazi Seferi dhe ekspertëve mjeko-ligjorë të policisë shkencore.
Nga konkluzionet e aktit të ekspertimit mjeko-ligjor të kryer në trupin e viktimës ka rezultuar se Kacifas, ka marrë dy plumba, një në pjesën poshtë nofullës, ku plumbi ka qenë tejshkues, duke hyrë nga poshtë lart, dhe një tjetër në pjesën e gjoksit.
Ekspertizat kanë saktësuar versionin e shprehur më herët në media nga gazetari Ferdinand Dervishi, se Kostandinos Katsifas ishte vetëvrarë, dhe jo vrarë siç u tha asokohe nga Drejtoria e Përgjithshme e Policisë. Ekspertizat kanë qartësuar se plumbin e marrë në kokë, arma ka qënë me puthitje, duke argumentuar se ka qënë vetë Kacifas, ai që ka drejtuar armën nga vetja.
Ndërsa plumbi i dytë është qitur nga e njëjta armë dhe qitja është kryer shumë shpejt. Pas kqyrjes së vendit të ngjarjes, nuk janë gjetur gëzhoja të qitura nga armët e forcave të policisë. Ndërsa shumë pranë trupit të Kacifas, është gjetur kallashnikovi i tij.
Pas lajmit të publikuar në mediat shqiptare, ka reaguar dhe Prokuroria e Gjirokastrës. Në deklaratën e saj thuhet se në Prokurorinë pranë Gjykatës së Shkallës së Parë Gjirokastër, është regjistruar procedimi penal nr. 824 në datën 24.12.2019, pas transferimit të akteve nga Prokuroria pranë Gjykatës së Shkallës së Parë për Krimet e Rënda.
Sipas kësaj prokurorie, nuk ka një akt përfundimtar dhe se duhet të pritet vendimi për t’u bërë publik. Ngjarja që për disa ditë e ktheu fshatin Bularat të Gjirokastrës, të banuar nga minoritarë grekë, në epiqendër mediatike, ndodhi në 28 tetor 2018. Pikërisht në këtë ditë gjatë kohës që mbahej ceremonia përkujtimore e festës kombëtare të Greqisë, ndodhi një ngjarje e rëndë. Një minoritar, i quajtur Kostandin Kacifas, qëlloi me armë policinë shqiptare në qendër të fshatit dhe pas disa orësh ai u rrethua nga RENEA në një zonë malore në dalje të fshatit Bularat.
Policia i ka bërë disa herë thirrje me artopalant që të dorëzohej, por mendohet se në kushtet e një gjendje të rënduar psikologjike ai të ketë kryer vetëvrasje. Pritet që në muajt në vazhdim të dalë edhe konkluzioni përfundimtar i prokurorisë së Gjirokastrës për këtë çështje./Ora
