Drejtori i Zyrës së OBSH-së në Shqipëri, Dr. Raul Gonzales Montero, që po mbështet qeverinë shqiptare në emergjencën e koronavirusit që ka shpërthyer në mbarë botën, iu përgjigj sot pyetjes që bëjnë të gjithë shqiptarët: Pse nuk ka asnjë rast me koronavirus në Shqipëri?
“Do të flas shkurtimisht në lidhje me epideminë, – tha Dr. Gonzales. – Do ta vë theksin tek pyetja më se e zakonshme dhe më shpeshtë kohët e fundit se përse nuk ka asnjë rast me koronavirus në Shqipëri?!
Ajo që do t’ju kërkoja unë si përfaqësues i OBSH-së është të keni besim tek institucionet, tek kapacitetet e ekspertëve, një pjesë e mirë e të cilëve janë edhe të çertifikuar ndërkombëtarisht. Sigurisht, ka shumë për të bërë, unë doja ta vija theksin tek kjo pjesë, por doja t’ju thoja edhe diçka tjetër.
Sapo jam kthyer nga vendi im, nga Spanja dhe para dy javësh ne kemi hasur raste të personave me COVID-19, të infektuar me COVID-19.
Por, pse ndodh që në Shqipëri nuk ka?! Ne jemi akoma duke mësuar! Kjo është diçka e re për ne!
Personat që u zbuluan në vendin tim, nuk kishin pasur fare kontakte, nuk kishin qenë as në Itali, as ndonjë kontakt me vendet ku incidenca është më e shpeshtë.
Një pikë tjetër që do të vija theksin është informimi dhe jam i lumtur që kemi mediat këtu dhe t’i shmangeni keqinformimit. Ne duhet të kemi besim tek organizatat e ndryshme, tek bashkëpunimi, të mos shpërndajmë lajme të rreme, që i bëjnë keq jo vetëm njerëzve, por edhe ekonomisë së vendit. Ne po punojmë ngushtësisht me qeverinë shqiptare dhe po i japim gjithë mbështetjen dhe dua ta uroj për transparencën.”
