Ministria e Arsimit ka publikuar ditën e sotme udhëzimin që shpjegon se si do të zhvillohet mësimi nga shtëpia, pas mbylljes së shkollave për një periudhë 2 javore, si masë parandaluese ndaj koronavirusit. Duke nisur nga nesër, Radio Televizioni Shqiptar do ti dedikojë një kanal ekskluziv mësimdhënies nga shtëpia.
“RTSH Shkollë, nesër, në orën 10:30-12:00, do të zhvillohen leksionet e matematikës për klasat 6-12. Ndërsa nga ora 18:00-19:30 leksionet e kimisë për klasat 8-12 në Radio Televizionin Shqiptar – RTSH 1”, shkruan ministrja Besa Shahini, e cila është komplimentuar edhe nga kryeministri Edi Rama.
“Super Besa Shahini. Një lutje prindërve që do të jenë në shtëpi, që të kujdesen për mësimet dhe ndjekjen e klasave në ekran. Sipas planit, mësimet online dhe në RTVSH për gjithë periudhën e luftës me virusin, do të zgjerohen hap pas hapi”, shkruan Rama në postimin e tij.
Për shkak të rasteve të konfirmuara me Koronavirus, Ministra e Arsimit vendosi dy ditë më parë mbylljen e institucioneve arsimore të paktën deri më 23 mars.
