Ndërkohë që brenda një dite janë dyfishuar rastet e të prekurve nga koronavirusi në Shqipëri, mjeku i njohur Pëllumb Pipero i bëri thirrje qytetarëve të qëndrojnë në shtëpi, ose në të kundërt “i shkojmë nga pas skenarit italian”. Në një lidhje për “News 24”, mjeku tha se ajo që ata shohin është vetëm maja e ajsbergut se java që vjen do jetë vendimtare.
Duke parë dyfishimin e numrit të të prekurve Brenda një dite, ai thotë se kjo nuk është një gjë normale. Në këto kushte, të gjithë duhet të ndërgjegjësohen e të mbyllen në shtëpi, pasi vetëm kështu luftohet virusi.
“Pas cdo rasti të konfirmuar fshihen 10 apo 15 raste të tjera. Në këtë situatë pandemie dhe shtimit të rasteve të prekura iu kërkojmë qytetarëve të jenë mirëkuptues dhe të ndjekin udhëzimet e qeverisë. Ne mjekët shohim vetëm majën e ajsbergut, ndërkohë që ISHP ndjek rastet e kontaktit, ne mjekojmë rastet që na vijnë. Java që nis është decizive për të parë edhe numrat edhe për të parë efektshmërinë e masva të marra. E përsëris, nga ky virus askush nuk është i paprekshëm, pavarësisht se dikush ka apo nuk ka komplikacione. Numri i rasteve është dyfishur në një ditë, pra sa më shumë të mos zbatojmë masat aq më shumë shtohen të prekurit”, tha Pipero.
Nëse sot nuk zbatojmë masat e nuk qëndrojmë në shtëpi i shkojmë nga pas skenarit italian, tha ai më tej.
“Minimalisht të qëndrojnë në shtëpi është shumë pak për të fituar shumë jetë njerëzish. Nesër do të jetë shumë vonë. Nesër i afrohemi një hap më shumë skenarit italian, por nëse qytetarët nuk na dëgjojnë, nuk kam c’tju them më pastaj: Zoti na ruajtët…”, sqaroi ai./BW
