5 qytetarë nga Shkodra që punonin si emigrantë në Greqi u kthyen mëngjesin e sotëm. Ata kishin udhëtuar nga ishulli Mikono për në Shqipëri. Kur mbërritën në Kakavijë u ndeshën me mungesën e mjeteve të transportit drejt qytetit të tyre. Anila Hoxha e Top Channel bisedoi me ta dhe mësoi një anë tjetër të kësaj situate të pazakontë në të cilën ndodhet Shqipëria: Abuzimin!
Emigrantët kishin paguar 30 euro për të udhëtuar nga Gjirokastra në Tiranë, me një furgon që sic thonë ata, ua gjeti prefekti. Ishin rreth 15 vetë sipas rrëfimit të tyre. Shifra e biletës është shumë herë më e lartë se sa kushton zakonisht transporti nga Gjirokastra në Tiranë. Dukshëm jemi përballë një situate ku është abuzuar me ata njerëz që ndodheshin në hall.
Nuk jemi duke thënë se tek ky abuzim është i përfshirë prefekti i Gjirokastrës, pasi emigrantët me siguri e kanë negociuar vetë cmimin e biletës me shoferin e furgonit. Por mbase në këtë rast prefekti dhe gjithë instancat e tjera përgjegjëse do duhej t’i siguronin një mjet transporti nga ato që përdorin insitucionet shtetërore.
Policia e Shtetit ka plot mjete transporti, Prefektura dhe Drejtoria e Emigracionit po ashtu. Në kushtet e masava të rrepta të ndërmarra nga qeveria për parandalimin e përhapjes së Covid-19, institucionet shtetërore në pikat kufitare do duhet të japin një zgjidhje edhe në situata si kjo me të cilën u ndeshën emigrantët që duhej të ktheheshin në vendlindje. Të shpresojmë që Prefekti i Tiranës nuk i ka gjetur ndonjë furgon tjetër për në Shkodër, po me cmim bilete 30 euro dhe në total nga Kakavija në Shkodër secili prej tyre ka shpenzuar 60 euro.
©argjiroja.net
