Kryetari i Partisë Demokratike, Lulzim Basha, tha gjatë intervistës në News 24 se plani ekonomik i prezantuar nga qeveria për situatën emergjente të krijuar nga Covid-19, hyn në fuqi më datë 1 prill. Rrjedhimisht tha ai, nga data 10 mars kur nisi karantina deri më 1 prill, qeveria s’ka asnjë masë për qytetarët e punësuar dhe biznesin.
“Çështja e mbështetjes me financa për ata që nuk shkojnë në punë. Është botuar akti normativ dhe nga publikimet e para thuhet se i shtrinë efektet nga 1 prill. Ndërkohë qe prej 10 marsit Shqipëria është ne masa drastike, dhjetëra mijëra, qindra biznese janë të mbyllura. Qindra mijëra familje janë pa të ardhura, si do te bëjnë? Çfarë duhet të bëjnë nga 10 marsi deri në 1 prill? Shpenzimet vazhdojnë si më përpara. Prapë 5 veta marrin dhjetëra milionë euro për beton në një kohë vetëm betoni nuk është prioritet; prioritet është shëndetësia, prioritet mbështetja e njerëzve me ushqime, me medikamente, me te ardhura. Prioritet duhet të jetë ekonomia, duke nisur me biznesin e vogël që është shtylla e ekonomisë, fermeri dhe biznesi në tërësi”, tha Basha.
