Kryeministri grek, Kyriakos Mitsotakis ka prezantuar dje paketën ekonomike në mënyrë që populli i tij të përballojë pandeminë e koronavirusit. Në një deklaratë për shtyp, fillimisht Mitsotakis i ka falenderuar të gjithë grekët për sakrificën e bërë në luftën kundër koronavirusit.
Më tej, ai ka vijuar me planin ekonomik duke njoftuar se do të japë një ndihmë emergjente prej 400 eurosh për 155 mijë të papunë në Greqi.
“Kemi më shumë se 14 miliardë euro për të mbështetur punëtorët dhe bizneset, gjithashtu kemi edhe 10 miliardë të tjera shtesë të siguruara nga BE,”-tha kryeministri në fjalën e tij.
Deri më tani në Greqi 750,000 punëtorë, të cilët nuk mund të punojnë po marrin asistencë prej 800 eurosh çdo muaj, 200,000 të papunë marrin gjithashtu asistencë. Ndërsa më shumë se 500 mijë kompanive u janë pezulluar të gjitha detyrimet tatimore dhe sigurimet.
Kryeministri theksoi se është fituar kohë e vlefshme për të siguruar që shërbimi shëndetësor nuk do të mbingarkohej duke shtuar se masat e marra do të lirohen por në mënyrë graduale dhe gjithmonë të bazura në sugjerimet e ekspertëve. Mitsotakis gjithashtu i inkurajoi qytetarët që të vazhdonin që të qëndronin në shtëpi në mënyrë që të mos hidhnin poshtë gjithë atë që kishin arritur për të mbajtur nën kontroll koronavirusin.
“Kjo është një luftë që nuk e kemi fituar akoma. Një rikthim i valës së pandemisë mund të jetë fatale për ne,“-tha ai.
Që nga shfaqja e rasteve të para, Greqia mori masa të rrepta për të parandaluar infektimin e qytetarëve nga covid-19. Deri më tani atje janë infektuar 2,145 persona, prej të cilëve vetëm 99 kanë ndërruar jetë.
