Në konferencën për media, Ministria e Shëndetësisë ka qetësuar qytetarët se pavarsisht shtimit të rasteve në ditët e fundit, koronavirusi është në kontroll. Zv.ministrja Mira Rakacolli, zbuoi detajin, që sipas saj tregon nivelin e vërtetë të përhapjes së COVID-19.
Bëhet fjalë për numrin e të shtruarve në spital. Ky numër ka ardhur duke u ulur në 10 ditët e fundit. Në shërbimin infektiv aktualisht janë 34 të shtruar. 5 pacientë janë në terapi intensive. Në spitalin COVID 2 “Shefqet Ndroqi”, janë 9 pacientë të shtruar. 5 pacientë janë në terapi intensive, ndërsa 3 prej tyre janë të intubuar. Në dy spitalet COVID aktualisht po marrin shërbim 43 pacientë.
Më herët edhe Italia, Spanja, Gjermania dhe SHBA janë shprehur se ulja e të shtruarve në spital, është treguesi i parë se koronavirusi mund të vihet në kontroll.
“Pavarsisht luhatjeve në numrat ditorë të zbulimit të bartësve të virusit apo të sëmurëve prej tij, situata është njëlloj e kontrolluar. Treguesi i vërtetë është numri i të shtruarve në spitale, që vazhdon të mbetet në shifrat e qëndrueshme, më pak se 15% e të prekurve aktivë.
Në mënyrë që situata të vazhdojë të jetë e kontrolluar është e rëndësishme që qytetarët me durim të respektojnë masat e distancimit fizik, si e vetmja mënyrë e kufizimit të përhapjes së infeksionit. Këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye“, – u shpreh Mira Rakacolli.
