Qeveria ka publikuar rregullat që do të duhet të zbatojnë taksitë, të cilat do të lejohen të punojnë nga 27 prilli.
në e-albania është publikuar lista e rregullave, ose protokolli i veçantë për taksistës, në kushtet e pandemisë.
Sipas Protokollit:
Shërbimi taksi ofrohet vetëm për transport brenda qytetit. Në asnjë rast nuk lejohet transporti ndërqytetas. Në rast kontrolli nga organet e policisë, pasagjeri duhet të tregojë arsyet e lëvizjes së tij në përputhje me ligjin. Në rast se automjeti kryen lëvizje ndërqytetase përgjegjësia bie mbi subjektin si dhe shoferin.
• Çdo shofer është i detyruar të deklarojë nëse ka patur kontakt me persona të cilët rezultojnë apo kanë rezultuar pozitiv me COVID-19.
• Çdo punonjës/tregtar që vëren shenja klinike gjatë qëndrimit në banesë nuk duhet të paraqitet në punë dhe duhet të lajmërojë menjëherë përfaqësuesin e entit administrues të tregut. Punonjësi duhe të telefonojë 127 dhe mjekun e familjes.
• Subjekti lejohet të veprojë vetëm në orarin e caktuar.
• Personeli i punësuar/Administratori/Personi Fizik Tregtar duhet të përdorë në çdo moment dorezat mbrojtëse. Dorezat ndërrohen çdo ditë.
• Personeli i punësuar/Administratori/Personi Fizik Tregtar duhet të mbajë në çdo moment maskën mbrojtëse duke mbuluar hundën dhe gojën. Maska ndërrohet çdo 3 ditë.
• Maskat, higjenizuesi dhe dorezat sigurohen nga subjekti pronar. Maskat mund të jenë edhe prej cope dhe në këtë rast duhet të ndërrohen çdo ditë.
• Në automjet duhet të ofrohet produkti higjenizues të duarve për klientët dhe të kujdeset për rimbushjen e tyre. Përqindja e substancës aktive duhet të jetë minimalisht 60%.
• Klienti dezinfekton duart në hyrje dhe dalje nga automjeti. Klienti mban dorezat dhe maskën mbrojtëse çdo moment.
• Pasagjeri ulet gjithmonë mbrapa dhe diagonalisht me shoferin e mjetit.
• Lejohet vetëm 1 klient në automjet në çdo rast, edhe kur udhëtarët janë nga një familje. Përjashtim bëjnë vetëm rastet e shoqërimit nga fëmijë të mitur apo persona me paaftësi.
• Në asnjë rast nuk lejohet kontakti fizik pasagjer-shofer.
• Kollitja dhe tështitja kryhen duke përdorur bryllin apo letër hundësh. Letra hidhet menjëherë në kosh.
• Shoferi kur kthehet në banesën e tij heq maskën dhe dorezat dhe lan duart e fytyrën për 20 sekonda me ujë dhe sapun. Dorezat dhe maska sipas rastit hidhen në kosh të mbyllur.
• Shoferët duhet të nxjerrin rrobat dhe uniformat e tyre në diell dhe ajrim pasi kthehen në banesë. Rrobat dhe uniformat duhet të lahen çdo 2-3 ditë.
• Kondicioneri duhet të jetë fikur dhe ajrosja të jetë natyrale.
• Subjekti duhet të kryejë dezinfektim të automjetit dhe larje pas çdo turni, sidomos të dorezave të dyerve e sediljeve. • Subjekti duhet të sigurojë ajrim sipas mundësisë minimalisht 5 herë në ditë.
• Pas veprimeve me cash/karta krediti shoferi dezinfekton duart me higjenizues.
• Subjekti duhet të afishojë listën e simptomave të COVID-19 sipas checklistës së miratuar.
• Subjekti duhet të afishojë detyrimin për vetëvlerësim të simptomave nga klientët dhe personeli i punësuar/adminstratori/personi fizik tregtar sipas formatit të miratuar ku përmendet përgjegjësisa administrative apo penale për personin që nuk merr masat sipas detyrimeve ligjore dhe numri jeshil për denoncim.
