Ministri Arben Ahmetaj ka mbërritur mbrëmjen e sotme në studion e “Opinion” me një valixhe të madhe ngjyrë gri. I surprizuar, gazetari Blendi Fevziu e pyeti se përse kishte marrë një valixhe udhëtimi me vete. Ndërsa ministri tha se aty brenda kishte futur dosjet me emrat dhe numrat e llogarive të personave që kanë përfituar nga paketa e ndihmave të qeverisë shqiptare.
Ministri Ahmetaj shtoi se deri më tani 52 mijë emra kanëpërfituar tashmë nga pagesa e parë, dhe 10 mijë emra që pritet të paguhen gjatë ditës së premte dhe ditës së hënë.
“Janë mbi 52 mijë emra që kanë përfituar. Unë do t’i lë me ju. Nëse doni të sfidoni të vërtetën kushdoqoftë mund t’i verifikojë. Këto janë emrat me numrat e llogarive bankare. Kam dhe paketën e dytë, janë 11,”- tha Ahmetaj.
Më pas ministri ka hapur valixhen dhe ka nxjerrë një dosje blu prej aty me disa dokumente.
