Drejtori i Përgjithshëm i Policisë së Shtetit ka pezulluar menjëherë nga detyra punonjësin e patrullës në Stacionin e Policisë Roskovec, shtetasin A. B., pasi ushtroi dhunë ndaj një gazetari në mes të qytetit në Fier. Polici fillimisht i ka thyer xhamin me sqepar dhe pastaj ka nisur ta qëllojë me grushta gazetarin. Argjirolajm.net sjell videon nga momenti i përplasjes teksa mbërriti patrulla e policisë për t’i ndaluar e shoqëruar në komisariat. Dyshohet se shkak i sherrit kanë qenë dyshimet e policit se gazetari dilte me të dashurën e tij.
“Sot, rreth orës 20:00, ky punonjës policie, jashtë orarit të shërbimit, në afërsi të sheshit qëndror të qytetit të Fierit, pas një konflikti për motive të dobëta, ka goditur me sende të forta automjetin e shtetasit Xh. O. dhe është konfliktuar fizikisht me të”, njofton policia.
Pas ndërhyrjes së patrullës është bërë shoqërimi i menjëhershëm i shtetasit A. B. në Komisariatin e Policisë Fier dhe personave të tjerë të përfshirë në këtë ngjarje.
Gjithë ngjarja ka ndodhur pasi polici pretendon se gazetari kishte dalë me të dashurën e tij. Grupi hetimor, në drejtimin e Prokurorisë së Fierit dhe SHÇBA-së, po kryen veprimet për zbardhjen e plotë të ngjarjes.
Ndërkohë, Drejtoria e Standardeve Profesionale në Policinë e Shtetit ka nisur hetimin disiplinor për shkelje të rëndë.
