Plot 140 ndërtesa, të ndërtuara para viteve 1990, fasadat e vjetra të të cilave e shëmtojnë Gjirokastrën, janë duke u rikonstruktuar. Bëhet fjalë për rehabilitimin e ndërtesave masive dhe pallateve të banimit në zona të ndryshme të qytetit, duke përfshirë edhe pjesën muzeale. Projekti financohet nga Banka për Zhvillim e Këshillit të Evropës dhe njëri prej zbatuesve është Fondi Shqiptar i Zhvillimit.
Sipas përfaqësuesit të këtij të fundit, Pavli Miço: “Pjesa më e madhe e këtyre godinave është goxha e vjetruar, ndaj po punohet për rikonstruksionin e fasadave të tyre, muraturës, etj. Problematike janë edhe konstruksionet e tyre në pjesën më të madhe prej tulle, të cilat paraqesin probleme për godinat, por edhe për imazhin e qytetit. Ato do të suvatohen dhe do të lyhen.”
Sipas kontratës, punimet do të zgjasin për gjashtë muaj. Për kryerjen e tyre janë punësuar rreth 120 persona, jo vetëm nga Gjirokastra, por edhe zona të tjera. “Pas ngritjes së skelerive ne po punojmë për rikonstruksionin e rreth 25 % të godinave të përfshira në projekt. Aktualisht, kanë përfunduar plotësisht punimet në disa godina publike si ndërtesat e kopshteve në pjesën e poshtme të qytetit dhe në pallate”, shton Miço. Zbatimi i këtij projekti mundëson jo vetëm rehabilitimin e godinave të komunizmit, por edhe përmirëson mënyrën sesi Gjirokastra u paraqitet grupeve turistike./konica.al