Kryeministri Edi Rama i ka dhënë lamtumirën koronavirusit. Përmes një statusi në rrjetet sociale, Rama shkruan se mbrëmjen e sotme do të japë komunikimin e fundit kuhstuar luftës me armikun e padukshëm, siç e ka konsideruar ai virusin Covid-19.
“Sonte në 21.00 komunikimi im i fundit kushtuar ekskluzivisht luftës me armikun e padukshëm Covid-19,“- shkruan Rama në status, pa dashur të japë më tepër detaje në lidhje me komunikim që do të bëjë.
Ndërkohë Shqipëria duket sikur dalëngadalë e ka lënë pas periudhën e pandemisë dhe po i kthehet jetës normale. Pothuajse të gjitha bizneset, janë të hapur, përveç pishinave, plazheve dhe klubeve të natës, edhe pse në orën 21:00 të darkës ulin qepenin.
Më herët, kryeministri Edi Rama është shprehur se kjo është java e fundit e kufizimeve, ndërsa fundjavat e izoluara kanë mbetur vetëm dy. Më pas, të gjithë do t’i kthehen jetës normale, duke mbajtur distancnë e nevojshme dhe nën protokollin e sigurisë, do të nisë sezoni turistik.
Ndërkohë, me 21 rastet e reja të shënuara ditën e sotme, shkon në 1050 numri i të infektuarve me COVID-19. Ndërsa numri total i personave aktivë në Shqipëri ka shkuar në 205, ndërkohë që janë shëruar 800 persona. Deri më tani 33 pacientë kanë humbur jetën.
