Ministrja e Kulturës, Mirela Kumbaro e ftuar në emisionin “Dritare” në Alpo Televizion, në një rrëfim të gjatë për karrierën dhe angazhimin e saj politik, ka treguar gjithashtu edhe lidhjen me Libohovën që prej fëmijërisë e deri në ditët e sotme.
Kumbaro thotë se ka qenë prezente në Libohovë vazhdimisht që prej fëmijërisë së saj e deri në ditët e sotme, por duke mos qenë ministre më parë, natyrisht që vizitat e saj të shpeshta nuk merrni vëmendje pasi ishin thjesht vizita të një personi të zakonshëm me origjinë nga Libohova.
Më poshtë rrëfimi i plotë për Libohovën dhe lidhjen e veçantë që ajo dhe të parët e saj kanë me këtë qytet.
“Unë jam nga Libohova nga babai, nga familja e Kumbaratëve. Gjithë familja ime nga babai kanë lindur dhe kanë jetuar në Libohovë.Unë vetë kam lindur në Tiranë, por familja vazhdon ta ketë shtëpinë në Libohovë. Dhe unë që ditën që kam lindur e deri më sot nuk kam rreshtur asnjë vit së ardhuri rregullisht në Libohovë, në të gjithë periudhat e pushimeve, por edhe në të gjitha ngjarjet familjare. Sepse është një familje që vazhdon zemrën ta ketë pikërisht në atë shtëpinë e familjes në Libohovë.
Unë kam ardhur çdo behar në Libohovë, që ditën që mbaronte shkolla e derisa fillonte sërish. Kjo në fakt është gjithë tradita e familjes time, halla, xhaxhallarë etj. Familja e Kumbaratëve është një familje shumë e madhe që ka nxjerrë njerëz kryesisht profesionistë, të cilët jetën e kanë ndërtuar mbi bazën e profesionit, të solidaritetit shumë të madh familjar, që nga inxhinierë, mjekë, diplomatë etj. Pjesa ime gjirokastrite është nga mamaja. Ajo është gjirokastrite me origjinë, me mbiemër Qallimi dhe babai dhe Boce nga e ëma.
Mamaja ime është mbesa e një patrioti shumë të madh si Elmaz Boce, i cili ka qenë një ndër themeluesit e shkollës së parë shqipe në Gjirokastër, shkollës “Liria” në Gjirokastër dhe një ndër firmëtarët e aktit të Pavarëisë në Vlorë. Stërgjyshi im ka qenë një personazh i rëndësishëm politik dhe kulturor, pasi ka qenë gjithashtu edhe një ndër themeluesit e teatrit të parë në Gjirokastër, teatrit “Besa”.
Të gjithë këto më kanë vënë para përgjegjësisë se duhet të bëj jashtëzakonisht shumë në jetë për të merituar atë emër të madh dhe për të vazhduar këtë trashëgimi kulturore të familjes time. Më duhet të vazhdoj emrin e mirë të familjes time.
Gazetari: Në Libohovë më kanë thënë se ministrja Kumbaro vjen shpesh dhe fle aty?
“Kjo vërteton atë çfarë thashë unë përpara dhe më vjen mirë që kjo vihet re. Në Libohovë ka njerëz që i njoh që kur kam qenë e vogël dhe më kanë shoqëruar gjithë jetën. Por jo vetëm kaq, ka edhe një arsye tjetër. Babai im, që ka ndërruar jetë në vitin 2013, ka punuar tërë jetën e vet në arsim. Ai dhe xhaxhallarët e mi kanë pasur një lidhje shumë të fort shpirtërore me Libohovën dhe janë përpjekur të kontribuojnë. Për shembull shkolla bujqësore, sot gjimnazi i Libohovës, ka qenë hapur me iniciativën dhe këmbënguljen të babait tim në vitet ’70. Halla ime ka qenë mesuese në shkollën e Labovës.
Gjyshi im Riza Kumbaro është një ndër arsimtarët e parë të Libohovës, ka qenë mesues në Nepravishtë, Labovë etj. Unë i gjej vazhdimisht këto gjurmë. Shkoj sot dhe takoj ish-nxënës të tij. Kjo vazhdimësi e familjes në fushën e arsimit dhe kulturës, mua më bën të lumtur, më bën krenare, por as më shqitet ndjenja e përgjegjësië që edhe unë duhet të kontribuojë”
/Libohova Online/
