Je mësuar gjithmonë të lexosh shkrime “Si ta bësh të lumtur”, “Si ta shpëtosh lidhjen”, por sot do shikosh një tjetër anë, atë se si ta shkatërrosh një lidhje. Dhe sigurisht, për ta ruajtur, duhet të mos ndjekësh këto 10 hapa.
Hapi i parë
Fillimi i rremë: Martohu me njeriun e gabuar, ose për arsyen e gabuar
Nëse marrëdhënia juaj ka nisur në mënyrë pozitive atëherë keni bërë gjysmën e punës. Nëse je martuar për të shmangur varfërinë, për të zënë një punë, nga presioni i familjes, nga vetmia ose se po të ikte ora biologjike, këto janë arsye të mjaftueshme të gabuara.
Po kaq sa këto arsye të gabuara, edhe martesa me njeriun e gabuar do ta bëjë të mjerueshme jetën tuaj. Zakonisht vajzat e mira e punëtorë tërhiqen nga djemtë e këqij si një mënyrë për t`iu arratisur jetës së tyre konservatore, për të kapur lirinë ose për të qenë në dorë të sigurt. Me kalimin e viteve kuptojnë që janë diametralisht të kundërt.
Hapi i dytë
Prit që partneri të të plotësojë
Pret që partneri të jetë i dashuri yt, mësuesi, argëtuesi, përgjegjësi, psikoterapisti, tifozi dhe madje edhe prindi yt? E ke të sigurt që do ta shkatërrosh këtë marrëdhënie.
Hapi i tretë
Mos bëj asnjë përpjekje për të komunikuar me të
Ki qëllim në vetvete që partneri mos të të kuptojë kur flet. Prit që të të lexojë mendjen. Mos i shpreh as mendimet dhe as ndjenjat. Bravo, e ke të sigurt fundin e marrëdhënies.
Hapi i katërt
Shmang çdo përgjegjësi dhe mos e prano kurrë që ishte faji yt
Nuk ka asgjë më të shpifur se sa të martohesh me një viktimë. Viktima është vazhdimisht në përpjekje të mjerueshme të forcojë pozitën e vet prej viktime. Nuk do të të durojë gjatë.
Hapi i pestë
Krijo konflikte dhe lufto për të fituar
Asnjë çështje, sado e vogël, nuk është e parëndësishme dhe ia vlen të bësh luftë me partnerin dhe të përpiqesh të fitosh me çdo kusht. Dhe kur të ziheni sigurohuni të bërtisni shumë, të shani dhe ofendoni, pra debati të jetë sa më shumë personal. Shaji nënën, babain, motrën ç`të ketë partneri. Mos humb rast pa sulmuar. Kryesorja është të mos e lësh të mbarojë ai/ajo asnjë fjali deri në fund. Fol vetëm ti.
Hapi i gjashtë
Elimino intimitetin sa të mundesh: Përdore seksin si një arsye për ta ndëshkuar
Bëj sikur do ti pikërisht në netët kur atij s`ia ka qejfi dhe kur do ai, ty le të të dhemb koka. Kur të mërzit gjatë ditës, ndëshkoje natën, madje për netë të tëra. Mos i trego kurrë çfarë të pëlqen dhe të kënaq në shtrat, sigurisht kjo të ndodhë pasi për vite të tëra të kesh pasur orgazma të shtirura.
Fli shumë parpara tij, që të të gjejë në gjumë, ose shumë pas tij që ta gjesh në gjumë.
Hapi i shtatë
Mbaj një qasje ndryshe nga partneri përsa u takon parave
Nëse ai kursen, shpenzo ti. Nëse ai shpenzon, ti bëhu kursimtare. Pra, bëj të kundërtën e saj që ai do. Mosmarrëveshjet ekonomike janë një nga arsyet më të forta që i japin fund marrëdhënieve.
Hapi i tetë
Përdor fëmijët për të ruajtur martesën
“Po rri me të për hir të fëmijëve”, “Po i bëj fëmijët për vete”, “Më tradhto, po do t`i shikosh më fëmijët pastaj”, janë fjali shkatërruese që do të sjellin një martesë të palumtur dhe pastaj ndarjen.
Hapi i nëntë
Tradhto
Dhe pasi të kesh qëndruar gjithë jetën për hir të fëmijëve e ata të jenë sistemuar pak a shumë në jetët e tyre ti krijo një lidhje paralele. Do që ta kesh ndarjes dhe urrejtjen e tij të sigurtë, tradhtoje me dikë që ai e njeh.
Hapi i dhjetë
Braktise me ndihmën e teknologjisë
Sot janë të gjitha kushtet për ta braktisur partnerin pa u larguar fare nga shtëpia. Rri gjithë ditën në internet, rrjete sociale, hyr në një botë virtuale kur ai është në shtëpi. Kur ai nuk është në shtëpi fike ti telefonin dhe as mos iu përgjigj fare telefonatave të tij.
Këto janë 10 hapat për ta shkatërruar! Në të kundërt, mos i respekto!
