Nuk ka të reshtur lënda narkotike e zbuluar dhe sekuestruar nga policia. Rasti i fundit është goditur në Gjirokastër, ku janë sekuestruar 90 kilogramë kanabis sativa.
Operacioni u kurorëzua gjatë ditës së djeshme, e martë, mbi bazën e një informacioni nga linja jeshile në numrin e telefonit, 08009090.
Shërbimi për Çështjet e Brendshme dhe Ankesat në Ministrinë e Punëve të Brendshme ka marrë një informacion nga një burim anonim se në lagjen “Pllakë”, Gjirokastër, në banesën e shtetasit H.X., i cili prej dy muajsh jetonte familjarisht në Greqi, kishte lëndë narkotike.
Banesa e të dyshuarit shtetasi mirëmbahej nga një i afërmi i tij.
Në bazë të këtij informacioni u krye kontroll në këtë banesë, ku në qilarin e shtëpisë u gjet e ambalazhuar në 17 thasë një sasi prej 90 kilogramë kanabis sativa dhe një arkë me fishekë.
Nga ana e uniformave blu u arrestua personi që mirëmbante shtëpinë, Hajri Dervishi, 59 vjeç, banues në lagjen “Puntore”, Gjirokastër, si dhe u shpall në këtrkim i zoti i shtëpisë.
Aktualisht hetimet janë në vijim, ndërkohë që materialet i’u referuan Prokurorisë së Gjirokastrës për veprat penale “Prodhim dhe shitje të narkotikeve e kryer në bashkëpunim” dhe “Prodhim dhe mbajtje pa leje e armëve luftarake dhe municionit e kryer në bashkëpunim”.